في حضـرة الشــهـداء
للشاعر / الشــحات الـنـقـيدي
******
عجزت سطور الشعر فى التفاصيل
تكتب ما تكتب برضه يبقى قــليل
الهم أكبر من كلام يترص
أو من دموع القلب وقت عويل
نَزْف المشاعر نزَف ساعة نزيف الدم
والفرح فينا اتحذَف لحظة ميلاد الهم
حرموا البرئ لُقمتُه فى الخدمة لاوطانُه
وكل واحد تَبع لجنونُه وشيطانُه
ولا عهد ليهم حكم ولا أى ملَّة يا عَم
مين اللى عامل كده إيه بس أغراضُه ؟
طبعا أكيد م العِدا انباعوا وانقادُوا
الجهل فيهم سكن دول صعب يتراضوا
كل اللى شاغل فكرهم يتهَد فينا الحيل
…….
اقتل ما تقتل بقى ده الزرع ربَّانى
بيزيد وفيه الأمل بيشِب من تانى
تحسب يموت لو دبل تبقي أكيد واهم
الجهل فيك اتحفر وصبحت مش فاهم
زرع الرجال ده عَفىْ الرب بارك فيه
تشك إنُّه انتهى تلقاه ولا يعانى
فاضل حروف تتكتب بيهم كمال السَّطر
والغنوة تعلا بأمل لشهيد بدمه العطر
فى الجنة يبقى السكن
وخلود ما بعده رحيل
عجزت سطور الشعر في التفاصيل
نكتب ما نكتب برضه يبقي قـلـيـل
……….؟!!!.
في حضـرة الشــهـداء للشاعر / الشــحات الـنـقـيدي
