يالا نفتكر
========
كوثر احمد عبد الرحيم :
يلا نفتكر
تعريفه ونكله ومليم
وصاغ نحاس قديم
شلن فضه ملمع
ونص فرنك مضلع
قرش من النص مخزوق
وبريزة الملك فاروق
******
لعبتنا كانت نحله ودبور
وعسكر وحراميه بالدور
ماتش كوره في حارتنا
ودوري بين حتتكم وحتتنا
ودورى ممتاز اخر تمام
الزمالك يتغلب من السواحل
والاهلي زيه من الترام
وحميد وحمدلله واوكا واكاما
واسامي ضاعت في الزحمه
******
البريموس كان وابور الجاز
وتلج باللوح لتلاجة الاستاذ
وسباك لفونية ببابورك ياخينا
ونلحم كمان خرم السربنتينا
*****
ألايس كريم كان جيلاتي
والكبابجي كان اسمه حاتي
والمصيف شقه وكابينه
والفسح سيما وجنينه
******
الشوكلاته بيمبو وكورونا
والعصير سكر وعليه لمونه
المشاوي دره وبطاطا
وايديك في جيبك وامشي بالاطه
******
الكتب من سور الازبكيه
والدعا من جوه التكيه
والتليفون من غير حراره
وقلة الادب كانت سيجاره
******
الحريم وقوره بدون حجاب
والدين عمره مافرق بين صحاب
والبقاله الحلوه من عند خريستو
والجبنه الغاليه يارومي يانستو
******
شكوكو كان بيعمل اراجوز
والخلاط علشان حليب وموز
ولو فاكر ياسيدنا كل ده
تبقي زيي قديم وعجوز
