قصة ارتفاع الاحتياطي كاملة .. تقرير اقتصادي
. الحقائق والمعلومات والرد علي اهم الشائعات وسرد الايجابيات والسلبيات
.متابعة خميس اسماعيل
1 – البداية مع معلومة خاطئة لكن شائعة ومنتشرة جدا :
الاحتياطي زاد اه … لكن بسبب قروض واذون خزانة وسندات بعكس الاحتياطي قبل الثورة كان احتياطي ناتج عن اقتصاد حقيقي ونشاط وانتاج وموارد دولارية طبيعية مش قروض …الخ
– طبعا دي خرافات , الناس بتتكلم وكأن الاحتياطي المصري اول مرة يكون متكون من قروض وسندات واذون او انها سابقة لم تحدث من قبل!
هما لو يعرفوا الحقيقة والمعلومة الصحيحة مكانش حد نطق اصلا
الحقيقة ان قبل الثورة الاحتياطي بتاعنا كان اكتر من 40% منه مكون من قروض وسندات واذون خزانة
اما ال60% الباقية فكانت تراكمات من فوائض السياحة والاستثمار والتصدير والقناة
.
وخلينا نبص للاخبار التالية من الارشيف اللى بتثبت صحة كلامي :
أ – وفى تقرير لمعهد التمويل الدولي قال فيها ان الاموال التى خرجت من مصر بعد الثورة حوالي 16 مليار دولار,
كانت استثمارات اجنبية فى اذون الخزانة
مصدر : https://goo.gl/AL8DzX
.
ب – وفي تصريح اخر للدكتور كمال الجنزوري رئيس الوزراء فى فبراير 2012 اثناء القائه لبيان الحكومة امام مجلس الشعب قال بوضوح : 10 مليارات دولار خرجت من مصر بعد الثورة
مصدر : https://goo.gl/z7RwLd
.
ج – قدّر الدكتور فاروق العقدة، محافظ البنك المركزى، إجمالى الاستثمارات الأجنبية التى خرجت من سوق سندات وأذون الخزانة المصرية خلال الفترة الأخيرة بين 20 يناير و31 مارس (2011) ، بنحو 7.5 مليار دولار
مصدر : https://goo.gl/DBbJk6
(اذون الخزانة والسندات : وسيلة من وسائل الاقتراض او الاستدانة لتمويل عجز الموازنة او احتياجات الدولة)
.
2 – استمرار حالة الفتي والتنظير عن جهل واهمها : الحديث عن الاقتراض وجذب استثمارات الاجانب فى اذون الخزانة وكأنها حاجة سهلة وبسيطة واي دولة تقدر تعملها بسهولة !
الجذب دة صعب جدا واي اقتصادي فاهم دة كويس وعشان كدة مصر كانت محل اشادة دولية كبيرة لما جذبت فوق 10 مليار دولار استثمارات 150 صندوق استثمار اجنبي فى ادوات الدين الحكومية (اذون وسنات الخزانة) من 3 نوفمبر ل 3 يوليو , يعتبروا من اضخم واعرق واشهر صناديق الاستثمار الاجنبية فى العالم
مصدر 1 : https://goo.gl/ujzqjG
مصدر 2 : https://goo.gl/27y1Xf
لاحظ اننا قدرنا نجذب نفس الرقم اللى هرب من مصر بعد الاضطرابات المصاحبة لثورة يناير
ودة فى حد ذاته نجاح اننا نوصل بمعدل الثقة فى اقتصادنا لنفس معدلات ما قبل يناير
.
3 – ازاي الاقتراض يعتبر نجاح ؟
السؤال دة هينقلنا لضرورة الحديث عن مؤشر التصنيف الائتماني , واحد من اهم 3 مؤشرات لقياس قوة وسلامة اي اقتصاد لاي دولة فى اي اطار زمني
(التصنيف الائتماني هو قدرة دولة ما علي سداد ديونها – الوكالات الرئيسية المسئولة عن التصنيف الائتماني فى العالم : فيتش – موديز – ستاندرد اند بورز)
ولو تابعنا حركة المؤشر دة فى مصر هتلاقي ان تصنيفنا ارتفع مرتين اخر سنتين ووصل لافضل مستوي من يناير 2011 مع نظرة مستقبلية مستقرة ودعم كامل لخطة الاصلاحات وللسياسات الاقتصادية المتبعة
مصدر : https://goo.gl/6owQVb
فى وكالة موديز كمثال بنشوف تاريخ مصر مع التصنيف كالاتي اخر 4 سنوات :
2013-03-21/Caa1 (Negative)
2014-10-20/Caa1 (Stable)
2015-04-07/B3 (Stable)
2016-08-19/B3 (Stable)
.
– يعني ايه الكلام دة ؟
أ – الانتقال من الC الي الB يعني تحسن
ب – الانتقال من الNegative للStable يعني تحسن طبعا
وواضح ان التحسن بدأ من نهاية 2014 لما بدأنا اول خفض للدعم فى اشارة علي جدية الاصلاحات لاول مرة من الثورة ودة اللى اجبر وكالات التصنيف علي توقع مستقبل افضل لاقتصادنا لو استمرينا فى الاصلاحات دى بنفس الجدية والسرعة وبالتالي توقعوا تحسن قدرتنا علي سداد ديوننا مع تعافي اقتصادنا بسبب الاصلاحات وبالتالي رفعوا تصنيفنا الائتماني
مفيش اي صندوق استثمار او حكومة او بنك هيقرض دولة لا يثق فى قدرتها علي السداد وتصنيفها الائتماني ضعيف وبيتراجع … لانه مسئول امام مودعيه عن الحفاظ علي رؤوس اموالهم وتحقيق عائد
وكذلك الاقتراض يعتبر نجاح لو تم ادارته بشكل رشيد وسليم وذكي
مصدر 1 : https://goo.gl/qKZRJh
مصدر 2 : https://goo.gl/1SCbbD
مصدر 3 : https://goo.gl/MtFgBS
.
4 – ليه اصلا بنقترض ؟
سبق وشرحنا بالتفصيل موضوع الديون من نظرة عالمية وعرفنا انه شيء طبيعي جدا وكمثال ديون امريكا وصلت ل20 تريليون دولار وديون تركيا 440 ملياردولار وديون اليابان 10 تريليون دولار
وان الدين فى حد ذاته كرقم لازم ننسبه للناتج المحلي الاجمالي
زي نسبة ال110% فى امريكا او 45% فى تركيا او 250% فى اليابان والصين او 150% فى قطر
وان المهم ان الدين يُستخدم فى مشروعات استثمارية مش استهلاكية
لتفاصيل اكثر : https://goo.gl/WHHnwH
.
5 – لكن ليه وصلنا لمرحلة الاقتراض بمعدل اكثر من السابق ؟
بسبب نتائج ثورة يناير , الثورة وتبعاتها كلفتنا حوالي 35 مليار $ موارد عملة صعبة “مجانية” من السياحة والاستثمار كان ممكن تحقيقها لو لم تحدث الفوضي وحالة التسيب فى 2011
الرقم دة (35 مليار$) حسبته بدون الاخذ فى الاعتبار معدلات النمو السنوية اللى كانت بتحصل للقطاعين
ولو حسبنا استمرار الامور طبيعية وعدم حدوث الثورة
او حدوث الثورة وانتهاء الفوضي وعدم استمرارها لما بعد يوم 11 فبراير
فالرقم هيرتفع ل47-50 مليار دولار , وبأكد تاني انها موارد “مجانية” ضاعت علينا بسبب اللى حصل
لتفاصيل اكثر : https://goo.gl/vQiMA5
.
كمان لازم نشوف ظروف المنطقة والعالم
بنشوف دولة زي السعودية مثلا – رغم غناهم الفاحش – بتطرح سندات “يعني ديون” يعتبر هو اكبر طرح فى تاريخ الاسواق الناشئة بقيمة 17.5 مليار دولار وبعدها طرحت صكوك “ديون بردو” بقيمة 9 مليار دولار وبردو كان اكبر طرح صكوك فى العالم
https://goo.gl/VZGQ9F
https://goo.gl/hSDKya
كذلك كل دول الخليج عانت من عجز بموازناتها يقدر ب145 مليار دولار فى 2016 :https://goo.gl/GgsdUH
الكويت تقترض 10 مليار دولار لتمويل عجز الموازنة لاول مرة منذ 16 عاما :https://goo.gl/1KCs3e
.
فظروف المنطقة والعالم صعبة والاقتراض شيء طبيعي جدا عند الاخذ فى الاعتبار ما تعرضت له مصر اخر 7 سنوات وانهيار اسعار النفط والركود الفادح فى اوروبا وتباطؤ النمو فى الصين ومشاكل الحمائية التجارية ووصول ترامب واسعار الفايدة فى امريكا وتاثيراته علي الاسواق الناشئة زي مصر ومخاطر الارهاب علي الحدود الغربية والمناطق الحدودية …الخ بعكس حالتنا قبل الثورة مكنش فيه حجم التهديدات دة وبالتالي المقارنة بين الاحتياطي 2010 واحتياطي النهاردة مقارنة غير سوية
.
6 – تركيبة الديون بالعملة الصعبة وعلاقتها بالاحتياطي ومعدلات الامان العالمية
الدين الخارجي = 73 مليار دولار او مانسبته 41% من الناتج
ليه مفيش خطر ولا قلق ؟
أ – الديون متوسطة وطويلة الاجل = 61 مليار دولار, اغلب الديون بمدد طويلة مش عاجلة
ب – الاحتياطي النقدي له معيار ثابت وعالمي لقياس مدي كفايته وهل هو رقم آمن ام لا
المعيار هو : كم يغطي الاحتياطي من شهور الاستيراد ؟
يعني الاحتياطي دة يكفينا نستورد لمدة كام شهر من احتياجاتنا من الخارج لو افترضنا اننا اتعرضنا لحصار لاقدر الله او ان مواردنا الدولارية توقفت فجأة لسبب قهري , الاقتصاد هيقدر يستمر بدون جذب تدفقات خارجية قد ايه ؟
الاحتياطي الحالي يكفينا 7.5 شهر من وارداتنا , الامان بحسب المعايير الدولية عند 3 شهور
يعني احنا تجاوزنا الامان ب3.5 شهر , اذن مفيش خطر هنا
مصدر / صفحة 56 من النشرة الشهرية للبنك المركزي رقم 243 : https://goo.gl/Gg1LHQ
.
7 – هل يستمر الاحتياطي فى النمو والارتفاع او الاستقرار ؟
لا طبعا , مش ضروري دة يستمر لفترة
لان ببساطة احنا عندنا التزامات دولارية خلال العام المالي الحالي تقدر ب11.5 مليار دولار
وفى نفس الوقت هيدخلنا موارد دولارية جديدة , لكن كام ؟ رقم صعب توقعه او تحديده وبيعتمد علي محددات كتير اهمها مدي تعافي السياحة والتصدير وايرادات القناة اللى مرتبطة بالتجارة العالمية وكمان الاستثمار الاجنبي ومعدلات الفايدة المرتفعة وتاثيراتها ومعدلات التضخم وتبعاته علي القطاع الخاص …الخ
وبالتالي الاحتياطي ممكن ينخفض الفترة القادمة ودة شيء عادي ومفيش داعي للقلق وقتها الا فى حالة عدم تحقق معيار الامان (3 شهور واردات)
.
8 – ليه الدولار مبينزلش لما الاحتياطي بيرتفع ؟
طبعا عمره ما هينزل بسبب الاحتياطي , فى سوق الصرف الحر مفيش اي علاقة او ارتباط بين سعر الصرف والاحتياطي النقدي الدولاري
الكلام دة كان زمان , لما بيزيد الاحتياطي كان بيتدخل البنك المركزي ويضخ دولارات اكبر فى السوق فينزل الدولار لكن دلوقتى احنا سوق حر والبنك المركزي لا يتدخل فى السوق واي كلام عن حدوث تدخل فهو كلام جرايد وصفحات سوشيال ميديا غير مصحوب بأي أدلة او اثباتات تتصف بالحد الادني من العلمية
.
واي هبوط حصل او هيحصل فى سعر الصرف ملوش اي علاقة مباشرة بالاحتياطي النقدي
التاثير الوحيد لارتفاع الاحتياطي هو تاثير نفسي غيرمباشر , يعني لو لسة فيه ناس معاها دولارات خارج البنوك هتخاف لما تسمع خبر ارتفاع الاحتياطي لافضل مستوي وهيشوفوه ان دة مؤشر حقيقي بيعكس تحسن الظروف الاقتصادية
زي ارتفاع عوائد التصدير والسياحة والانتاج المحلي والاستهلاك وارتفاع الموارد فيبدأ سعر الصرف ينزل فيخسروا فلوسهم , فيضطروا يروحوا يحولوها بسعر النهاردة بدل المجازفة والانتظار
.
9 – ضمن بيانات البنك المركزي اللى خرجت الايام الاخيرة … فيه كلام عن ان الاستثمارات انخفضت , ايه حقيقة الموضوع ؟
الاستثمارات الاجنبية المباشرة بعد تحرير سعر الصرف حتي الان لم تنخفض قولا واحدا
الاستثمارات ارتفعت , وانا بتكلم عن الاستثمارات بانواعها : المباشرة (مشروعات حقيقية) واستثمارات فى ادوات الدين
.
**اومال ازاي خرج علينا الخبر دة : (أعلن البنك المركزي المصري، أن صافي حجم الاستثمارات الأجنبية المباشرة الوافدة إلى مصر قد بلغت خلال الربع الثاني من العام الحالي ، لتصل إلى 2.2 مليار دولار، مقابل 2.7 مليار دولار في الربع المماثل من العام الماضي)
الخبر بيقول ان فيه انخفاض فى فترة مارس – يونيو 2017 مقارنة بنفس الفترة 2016
ودة صحيح لكن …
اولا التعويم محصلش فى فترة مارس- يونيو عشان اقول ان التعويم فشل فى تحقيق اهم هدف له وهو جذب الاستثمارات !
ثانيا الانخفاض مش كارثي ومش مستمر
التعويم حصل فى نوفمبر وبالتالي انا لازم احسب من نوفمبر للنهاردة مش من مارس للنهاردة
.
– وبناءا عليه لما نيجي نبص للاستثمارات فى ادوات الدين من نوفمبر هنلاقيها زادات 20 ضعف عما قبل التعويم
ووصلت ل9.8 مليار دولار او 175 مليار جنيه
مصدر :https://goo.gl/Nz927Y
– من ساعة هروب رؤوس الاموال بسبب ثورة يناير لحد 3 نوفمبر 2016 (اي 7 سنوات)
الاستثمارات فى ادوات الدين مكنتش بتتجاوز ال100 مليون دولار شهريا بحسب بلومبرج
مصدر : https://goo.gl/AaxBTV
جدول بالتسلسل الزمني من ديسمبر 2010 لديسمبر 2016 : https://goo.gl/XR93At
.
** بالنسبة للاستثمارات الاجنبية المباشرة
أ – ارتفعت 17% … بحسب تقرير ال(FDI-foreign deirect investment)
الصادر عن الاونكتاد UNCTAD وهى هيئة تابعة للامم المتحدة والتقرير يشمل فترة 2016 (شامل شهرين من التعويم)
ب – ارتفعت 12% بحسب تصريحات وزيرة الاستثمار سحر نصر وبيانات البنك المركزي عن فترة يوليو 2016 – مارس 2017 (شامل 5 شهور من التعويم)
التقرير كاملا من موقع الاونكتاد : https://goo.gl/bh7P1s
تصريح سحر نصر : https://goo.gl/bSqus3
.
*اذن هتعرف ان سهل جدا انك تتلاعب بالارقام والفترات الزمنية عن طريق اجتزائها عشان توصل معني معين او رسالة معينة , زي الناس اللى مسكت فى فترة معينة لاثبات ان الاستثمارات انخفضت رغم انها اجمالا ارتفعت , لكنهم كان اذكياء فى قلب الحقيقة وتضليل القاريء
.
10 – ايه اهم مؤشر كاشف لكيفية استخدام القروض بشكل صحيح ولاخاطيء؟
الاجابة الوحيدة : فرص العمل , فرص العمل هى مرآة القروض وهى المعدل الفاضح لحقيقة استخدام الديون
فى عز الازمة الاقتصادية اللى بنمر بيها ,هل بنستخدم القروض استخدام سليم ؟
استخدام استثماري لتوليد وظائف ورفع الانفاق والطلب والدخول والانتاج
ام استخدام استهلاكي للاجور والدعم واستيراد السلع ؟
هنلاقي ان البطالة انخفضت من 13.3% فى يوليو 2014
الي 12.7% فى يوليو 2016
الي 12% فى مارس 2017
يعني انخفضت 1.3% فى 3 سنين
مصدر :https://goo.gl/7qQopb
.
تاني مؤشر هو : ما مدي فقدان الوظائف فى مصر ؟ يعني ايه درجة رفد/فصل الموظفين فى مصر ؟
دة هينقلنا لاستطلاع مؤشر مديري المشتريات (PMI Index )
اللى بيصدر شهريا عن بنك الامارات دبي الوطني ل30 دولة تضم اهم الاسواق المتقدمة واهم الاسواق الناشئة
منهم مصر بالشراكة مع اي اتش اس ماركت
اللى بيرصد فى احدث تقاريره اللى صدر فى 5 يوليو 2017 :
استمرار الازمة الاقتصادية وحالة فقدان الوظائف فى مصر لكنها فى ابطأ وتيرة منذ 19 شهر !
يعني ايوة لسة فيه مشاكل وناس بتترفد وبتخسر شغلها والشركات بتخفف العمالة لكن لو كنا من 19 شهر بنرفد 10 الاف موظف فالنهاردة بنرفد 3000 موظف (ارقام افتراضية للتبسيط) ,
وبالتالي دى معلومة كاشفة لانخفاض حدة الازمة تدريجيا وان كانت ببطء بالتوازي مع انخفاض البطالة , يعني معدل الناس اللى بتكسب فرص عمل جديدة اكبر من معدل اللى بيخسروا وظائفهم
مصدر : https://goo.gl/JP4Zo2
