للشاعر/صلاح أمان
مؤسس صالون موجة سكندرية
سراب
أنا كنت فاكر انك انتي هديتي
وان القدر هو ال جابك سكتي
واكتشفت الفكر خاني رغم اني
كنت شايلك جوه نني محبتي
كنت فاكر اني بفهم
واني شاطر في الهوي وفضلت أحلم
كنت فاكر هو ده الحلم السعيد
ال راح يحييني وياخدني لبعيد
سبت كل مافي الأرض وطلعت السما
لما لقيتك في العلالي بتندهيلي
مدا قلبك ليا بالشوق وتقوليلي
أيوة انت
انت بس اللي بحبه
كان جواب من غير سؤال
قلبي من تأثيره مال
واتولد من بين حطام التلج قلب شاعر
صحصحت فيه المشاعر
والربيع فرد جناحه علي الفصول
خضر صفار الوحدة في عيون الخريف
والشتا أصبح أليف
والكون لطيف
باختصار
كنا بين ادمان وكيف
فجأة..
فجأة وف وسط الزحام
واحنا سكاري م الدفا والإلتحام
هبت رياح شتوية
جايبة من قلبك عواصف
قلعت جذور العشق من أرض العواطف
دبلت من فجرها زهر الوداد
نشفت عود اللقا
وابتدا ورق المحبة
ورقة ورقة يسقطوا
وال كان شلال هوي
دلوقت لو حنوا علينا ينقطوا
وال كان إدمان زمان
حسيت كأنه بينسحب
كالدم من حضن الوريد
زلزااااال شديد
هد كل ال اتبني وعم الخراب
والمدينة الفاضلة
ال كانت طاله من فوق السحاب
صارت تراب
وانسد بينها وبين هوايا ألف باب
ورجعت تاني لدنيتي
دنيا الغياب
يمكن في يوم أعرف أداوي غلطتي
لما كنت فاكر نفسي إني بفهم
واني شاطر في الهوي
ولقتني بحلم
أيوة بحلم ……
بس كان حلمي سراب
…………………………………
