للشاعرة / دنيا سعيد
قصر ثقافة كفرالدوار بحيرة
” الوضع الحالي”
الوضع الحالي ..
من بعد ١٢ وانا جالي ..
متلازمة شوق وحنين ودموع ..
موضوع بيجر وراه موضوع ..
ف بنبدأ ندخل في فلاش باك ..
طعم الأيام ك القهوة بلاك ..
أصبحت الخنقة خلاص ملكاك ..
أصبحت الدمعة بتخنق فيك ..
مين فيهم كان وياك ومعاك ..
مين فيهم أصبح فجأة عليك ..
مين سابك لكن ..عايش فيك !
ملعونة تاني الذكريات ..
ملعون حنين بيهد فيك ..
وإن كان لآخر حد .. مات ..
والأخر بيجيب ف الأول ..
ف بتبدأ تدخل دوامة ..
والوقت الممتع يتحول ..
ويسيب جواك ألف علامة ..
البيت حيطانة بتبكي وتشرخ ..
من شوقها لفراقهم والله بتصرخ ..
والليل تملي بيقسى ويجرح ..
وكإن يعني قلوبنا مش بتحس ..
الليل طويل بيهد فينا وبس ..
ويقلب الأوجاع وبيفضح المستور ..
جواك ف قلبك ياما برضو كسور ..
الصبح باين جبل .. بالليل تنام مفتور ..
الكسر ف المكسور ..
والله مش فارق ..
مش فارقة مين فارق ولا حتة مين هيروح ..
الدبح ف المدبوح ..
اصبح مابيأثرش ..
الليل مبيكسرش ..
الليل مالوش ولا ذنب ..
الجرح جرح القلب ..
مش جرح ليل يعني ..
انا كل ما أجي أنام ..
قلبي اللي يوجعني ..
ف خلاصة الأوجاع ..
إذا كنتو مش راجعين ..
خدوا كسرة جوا العين ..
خدوا صوتكو من قلبي ..
وصورتكو جوا البيت ..
خدوا كل شئ ليكم ..
لمستكوا بإديكم ..
على اي جرح يهون ..
وإذا كان أواني مجاش ..
لازم الحياة تتعاش ..
ف هعيشها فكراكم ..
ولحد ما ألقاكم ..
خليكوا فاكريني ..
وزوروني ف الأحلام ..
وأنا وعد مني هنام ..
وإن يوم لقيتكوا اوهام ..
هدعيلكم من قلبي ..
وادعيلي بالرأفة ..
عدت شهور وسنين ..
ماشية الحياة أما أنا ..
فعلاً خلاص واقفة
………..؟؟!!
