البيوت كانت ع الطوب
ولا تشطيب ولا كهارب
وف كل حيطة الف شق
والشقوق فيها عقارب
والنومة كانت ع الحصير
والمخدة جوز قوالب
وإن عطش القلة جمبه
ولو جعان فيه عيش ورايب
ووسط البيت فيه (طلمبه)
وجوه حوضها فيه طحالب
والكانون والفرن بلدي
وسطح البيت بالسبايت
حامد ربه ع اللى عنده
تقولش عمده ولا نايب
والاعمار كانت طويلة
والمرض كان عنه غايب
والبيوت عمرانة حب
و ع الدكة يتلموا القرايب
اما النهاردة بيته جنة
بس مليان بالمصايب
الفلوس والخير كتير
بس عدمان من الحبايب
والمرض مسايبش حد
والهموم مرار ودايب
والأعمار بقت قصيرة
والراحة عليها ضرايب
