بقلمي
طه هيكل
***********************
روايحه هلت علينا
شهر رمضان
خيره بيعمنا
كرمه بيلمنا
شهر رمضان
فوانيس وفرحة كبيرة
ومدفع الإفطار
ومسحراتي زمان
اللي كان
صوته بيشجينا
والسهر للفجر يوماتي
والحب ضلل علينا
والتقوى والإيمان
وافرح بالتراويح
وانعم بالتسابيح
وصوت الأذان بيهزك
من جواك
والبلح من الظهر بايت
لحد ماييجي الأوان
واشرب ياعم وادعي
ربك يقبل صيامك
والشيخ رفعت وصوته
يخليك في عالم تاني
زي ماتكون حاسس
بروايح الجنة
وعم محمد ربيع يقول الله أكبر
نجري ع البيت ونسبق الريح
المارد خرج م القمقم
وناولني البلح يا خال
والعرق سوس
في الجامع
مجهزينه للصايمين
والحر عامل عمايله
مخليك زي الفرخة
اللي بتطالع في الروح
لاقادر تتكلم ولا تقول
تلت التلاتة كام
صايم طول اليوم
والمغرب خلاص ها يدن
والمية قرب الشفايف
بينا وبينها الله أكبر
وأبويا يقول استنوا لما يتشاهد
ونسمع صوت الأذان وهوبا مرة واحدة
نعبي المعدة ونتنبل
برميل مية جوه البطون
ماشي بتلق والمعدة مليانة
هاتصلي ازاي
ونروح الجامع ونزوغ عشان سمورة
وفطوطة ورأفت الهجان
وشوية نيللي وفؤاد المهندس والست شويكار
ودموع فاطمة اللي عميت
عشان جمعة الشوان
وآدي الحكاية والرواية
حكاية عمنا رمضان
الله يرحمها من أيام
طه هيكل
حكاية العم رمضان
