علاوة على شكاوى المواطنين البسطاء اليومية التى لا تنتهى من تدنى مستويات الرعاية الصحية بالمستشفيات الحكومية وعدم تواجد الاطباء وعدم توافر الادوية والاهمال الرهيب فى كل قطاع الصحة بالشرقية علاوة على ذلك نجد من يزيد الطين بله فهذة الواقعة حدثت اليوم بالفعل فى مستشفى الابراهيمية بالشرقية يرويها لنا الاستاذ /السيد ابو النجا كما حدثت معة بالتفصيل
“الفساااااااد يا سادة هو من يهدم الأوطان
حدث اليوم بمستشفى الإبراهيمية المركزى
ذهبت و والدى اليوم السبت 15/7/2017إلى مستشفى الإبراهيمية لإجراء بعض الفحوصات الطبية
و ذهبت إلى الخزينة لسداد رسوم الأشعة و هى 25 جنية للأشعة العادية الديجيتال و 18 جنية للسونار و كان هناك اكثر من شخص مثلى يسددوا الرسوم و لاحظت ان موظف الخزينة يكتب الإسم فقط فى الدفتر ثم يرفع اول كربون و يكتب على الصورة الثانية التى يأخذها المريض لإجراء الفحص المطلوب و يقطع الوصل و يعطيه للمريض
شككت فى الأمر و بعد أن أخذت الوصل و خرجت عدت اليه مرة اخرى و كانت المفاجأة
ممكن اشوف حاجة بعد إذن حضرتك فى الدفتر بخصوص وصلى الأصلى
فارتبك و اعطانى الدفتر و فوجئت بالكارثة الوصل الأصلى و الصورة فى الدفتر اللى بيورد بها سيادة الموظف متسجل فيها رسوم ابو 25 جنية ب 5 جنية رسم قلب و أبو 18 جنية متسجل ب 10 جنية و بمواجتهه قال هذا خطأ غير مقصود
خرجت لشخص سبقنى و أحضرت وصله و راجعته فإذا هى نفس المصيبة الوصل الصورة تمام 25 و الأصل ب 5 جنية و هنا أصبحنا أمام حرامى مغتلس كبييييير
و بمواجهته بدأ يستعطفنا و وصل الهوان به أنه أراد أن يقبل يدى لاستر عليه و بصراحة ضعفت و قولت بشرط تسيب الخزنة قال ماشى و راح معى للسيد الدكتور المحترم احمد حسن مدير المستشفى و طلب ترك الخزينة لأنه مريض و بيغلط فقاله طيب كمل لعند ما اشوف لك حد يمسكها
و خرجت و لم أتكلم كلمة واحدة و لكن بعد ان رأيته على المكتب و بيكمل شغله حسيت إنى خاين لبلدى و مشترك معه بالتواطئ معه و التستر عليه
فذهب لرفيقى اللى راجعت وصله و أخبرته أننا كده غلطانين قالى صح قولت طيب ما تيجى نروح للمدير و نمشى الموضوع رسمى بشكوى
و دخلنا و وجدنا السيد الدكتور أحمد حسن مدير المستشفى و معه مدير حسابات المستشفى و قالى عندما رانى مش كنت هنا من شوية قولت له ايوه مع الحرامى بتاع الخزنة
أستغرب و سأل حرااااامى؟
قولت ايوة حصل كذا كذا و حكيت له الحوار
و فورا وجه مدير الحسابات لمراجعة الوصل اصل و صورة و الرد حالا و خرجنا و راجع و وجد كلامنا صحيح و وقع على الوصل فى الدفتر
و كتبنا مذكرة رسمية و أشر عليها السيد مدير المستشفى بالتحقيق و التحويل للنياااابة الإدارية فورا
و هنا طلبت من مدير الحسابات مراجعة كل وصولات اليوم اصل و صورة فأخبرنى بأنه سوف يراجع شهرين سابقين و لن يرحمه و طبعا مش عاوز أقولكم طيابة الحاج و هو بيقولى كانت أشعة سودا اللى جابتك هنا تخرب بيت الراجل أنت يا ابنى مفكر نفسك جاى تفتيش انت جاى تقضى مصلحتك و تروح و بلاش مشاكل
طبعا انا آسف يا والدى و الله فكرت زيك فى البداية لكن حسيت إنى خائن لنفسى و أهلى و وطنى أمام حرامى يأخذ 80% من قيمة الوصل و يعطى المستشفى 20% و المفروض ان المستشفى يقدم لنا خدمة محترمة كما تعودنا طيب ازاي و منين و هو منهوووووب
أتقدم بالشكر للسيد الدكتور أحمد حسن مدير المستشفى و السيد مدير الحسابات لسرعة الاستجابة و إتخاذ القرار الفورى و أتمنى أن يتم الموضوع بعدالة و لا تأخذهم به شفقة
#هل_أنا_افتريت_أوفضحت_ولم_أستره؟
#هل_أصلا_له_عندى_حق_الستر
#اللهم_ان_هذا_لوجهك_لارياء_ولاعنترية_ومانشرت_الا_لحفظ_الحق_وضمان_عدم_الطرمخة_واعطاءالجزاءالمناسب
#والله_على_مااقول_شهيد
لحضراتكم صور مرفقة من الدفتر و صورة و صورة المذكرة تثبت صحة الواقعة
