الشخصيه الحساسه
بقلم .. امل اللقاني
الشخصيه دي بتخاف ترفض لشخص طلب حتي لو الطلب ده هيكون علي حساب نفسها ، الشخصية دي اكتر شخصيه بتظلم نفسها وتفضل دايما جواها صراع داخلي وكتير بتيجى على مصلحتها عشان الناس . الشخصيه دي لما شخص يزعلها و تفكر انها تعاتبه و يزعل هو من عتابها ترجع تزعل من نفسها انها عاتبته برغم انها معاها الحق،، شخصيه مبتريحش نفسها لانها ببساطة بتزعل و تفضل تكتم جواها لحد ما تقرر انها متتعاملش مع حد او لما تفكر تتعامل بتقسى جدا علي اللي قدامها و ترجع تندم على اللي بتعمله لان ده مش من طبعها الفراغ بالنسبالها مصدر سلبي لأي حاجة وحشة، لان ابسط موقف بيحصل معاها بتفضل قاعده مع نفسها وتفكر فى كل المواقف الصعبة اللي تعرضت ليها. الشخصية الحساسة هي اكتر شخصية تعطى الحب بدون مقابل ،، و اكتر شخصية ممكن تكره الحب ده لو كان سبب في اضعافها التعامل مع الشخصيات الحساسة دي ليه ميزه و عيب الميزه انهم قلبهم طيب وحنين جدا عكس ما بيظهروا و بيسامحوا اوقات كتير اما العيب فإنهم بيدققوا في التفاصيل جدا ، وعايزين معاملة من اللي قدامهم زي اللي بيعاملوا بيها ، و ده بيسبب لهم مشكلة اكتر لما يتعاملوا مع شخصيات مختلفه عنهم لانهم للاسف مش بيلاقوا المعامله الى مستنينها بيسامحوا مرة و اثنين و ثلاثة بعد كده لما يقلبوا بيكونوا شخصيات تانية عصبية جدا ، ممكن ده يسبب لهم قلة ثقة بالنفس جواهم و احيانا في كل اللي حواليهم الشخصية الحساسة بتكتم جواها و بتحاول تراعي مشاعر غيرها و ده مبيكونش ضعف منها ،، هي بس باقية علي العشره ، إنما لما بتقلب مبتعرفش ترجع زي الاول نصيحة مني قدروا وجود الناس دي في حياتكم لان وجودهم سند حقيقي لأنهم اكتر ناس ممكن يهتموا بجد و اكتر ناس لما تزعل بتبعد بجد حاولوا لو هتتعاملوا مع شخصية حساسة بلاش تتعبوهم لأنهم بيتعبوا لوحدهم بسبب طريقة تفكيرهم.
