بقلم الكاتبة/ايمان جمال الدين
إبني العزيز اللذيذ … “المراهق”
سبب الهم و حرق الدم
ده انا لولا بحبك و اهتم
و لا كنت اتعصب و اتغم
و لا كنت اتابعك .. و اعاتبك
و لا كنت الومك .. و لا احاسبك
و لا كان عقلي مني يشت
و انت مقضي ساعات على النت
و هامل حالك … بتقول مالك؟!
زهقان .. متضايق .. تعبان
و ماسكلي على الجمله إياها
“إمتى هتفهمي اني كبرت”
و مهما نصحت
ولا خاصمت …
تعند و تكابر و تصد
و تجنني طريقة الرد
و مهما ارخيلك حبل الود .. انت تشد
و انا عوزاك راجل و بجد
مش بعلو الصوت و العند
يابني الله يهديك إفهمني
حاول تعقل كده و اسمعني
هو انا غاويه اتنكد يعني؟!
أنا عوزاك تبقى أحسن مني
مش في دراسة و لا في وظيفة و لا في مكان
إن شاء الله تقضيها جنان
أو حتى تطلع فنان
أنا بحلم اخليك “إنسان”
أخلاقه تعمر أكوان
و اللي يعامله يدعي لأهله …
و يقولوا ده زينة الجدعان
و اوصل بيك لبر أمان❤
إبنى العزيز اللذيذ….” المراهق”
