…..
شعر : د. جــمال مرســي … متابعة مخـتار عـيـاد
….. القسم الأدبي
أمي الغاليه
أمي يا أحلى و أغلى الناس
بهديلك أجمل إحساس
وان أهديلك كل حياتي
مش ممكن هتوفي جمايلك
دي جمايلك دايماً ع. الراس
يبقى كفايه أقدم ورده من أشعاري
تنقل لكْ كل الإحساس
***
امي حبيبتي
نفسي أضمك و تضميني زي زمان
نفسي لو ارجع طفل صغير
أرضع منك نهر حنان
نفسي أبص في عينك و اقرا ..
كل كتاب كنتي كتبتيه
وأحس ف . عينك بأمان
غدر الدنيا يا أغلى الناس
خلى القلب مهوش فرحان
غدر الإنسان بالإنسان
فين ايامكو الحلوه يا أمي
فين الطهر مع العرفان؟
ومبادئ ياما شربناها
وحاجات حلوه اتعلمناها
ولا يمكن أبدا ننساها
تنفع كل زمان و مكان .
***
شاب الشعر و عدى العمر .
وانا دايماً مشتاق للقاكي .
والغربة الصعبة و أيامها
هدت كل كيان و كيان
عاوز أقوللك كلمه ف. سرك
عاوز أطوف بصوابعي يا غاليه
بجنة خدك
واقطف كل حروف أشعاري
من حرف مزهزه بشفايفك
نفسي اتمتع بالبستان
زي زمان
بس خسارة يا اغلى الناس
روحتي و غبتي
ولا حتى بعتي العنوان
***
عند الخالق خدتي طريقك
وفرحتي بجنة رضوان
سبتي صغار كتاكيت ف. الدنيا
ما لهومش ضوافر و سنان
ولا ليهم في الشر طريقه
ولا عرفو طريق الطغيان
لكن كلمةحق بقولها
سبتي ولادك للرحمن
والي يكون في حماية ربه
مش ممكن أبدا يتهان
