بقلم الشاعر/سعيدشحاته
حملتنا الجايه عشان نخلص من أي شريف
من أي نضيف بيحاول يغسل روحه بضيّ
من كل ضمير في العالم حيّ
اقتل غلبان مش لاقي تمن تلقيمة شيّ
علشان تفضل وحدك موجود
لا تبص على مطبات أرواح
ولا تستسلم لقانون الدود
وافضل مفرود تآذي وتدبح
واشرب دم الفقرا وسبّح بالمال السايب والمسلوب
الحلم فى نن العين مقلوب
وفقير الحاره الدواره موطّي ومغلوب
اقتل غلبان وادبح أيوب واظلم ناعسه
وابعت للفجر الجاي بعثه بغزلان ووحوش
شعر الشاعر دائمًا منكوش
شعر القاتل دائمًا متساوي ومتسبسب
شعر المدبوح غرقان في دموع المحترمين
أنا حاسس إني كئيب وحزين
حاسس باليأس وبالملايين بيحاربوا فى بعض
اقتل غلبان وابرق وارعد
البيت الفاضي يخاف من الرعد
ويخاف من صوت الضحك الحاف
ويخاف من صمت حيطان الحاره الدواره
ويخاف من شكل الطير لو طار وقت الغاره
ويخاف من البيّاره المفتوحه لأكل العيش
اقتل غلبان وادبح درويش واصلب رايه
وان جدع غنّي معايا لبكره المخنوق
الدنيا بتلعق عرق الناس وبتفتل طوق
حملتنا الجايه اتفضل فوق واشرب تفاصيل
عفريت بيبص فى وجهه الليل ويخش قوام
زعلان وكأني طلعت إمام مش فاهم شيء
بيقول وبيعمل نفسه بريء فيقول تاني
الشيخ حسني فى فيلم الكيت كات ظبط الجاني
وانا هرم ابن الكلب المجنون استعماني ودبح المساكين
أنا كنت ما كنتش أو مش فين أو جاي منين؟
الواد ابن الحلم بيضحك ورقبته بتلمع في السكّين
جرى إيه ما تفوق يا كئيب وحزين
زعلان جدًّا وكإني بقالي يومين زعلان
اقتل غلبان واعمل مش فاهم واستهبل
واستقبل بكره بقلب رصيف
واعزم برغيف على أي جعان جاي يشهد زور
البنت بدور كات بتشاور للواد محمود في الفيلم إياه
محمود ما سمعش كلام الله
حملتنا الجايه لكل جيوب أباليس الدمّ
لبتاع طنّش.. واهبد.. واضرب.. واتسلّى يا عم
حملتنا الجايه
اقتل غلبان واستنزف أُم
الدمع المخنوق جوه الكُم منبّت خيط
واللون مكبوب عامل شخابيط فوق اللوحه
مصبوب ع الكلمه الممسوحه
دايب فى الضحكه المجروحه
سايح من الرقبه المدبوحه
بايح بالصرخه المبحوحه ف وش المناكيد
محمود بيبص ف وش بدور زي المحاميد
وبيرسم عيد ع الوش المكشوف المألوف
والورد الطارح في الشارع راكع للخوف
اقتل غلبان وادبحي يا سيوف
الكيف حابك والناي مشطوف
والكلب الواقف بيهوهو ع الباب حلّوف مش كلب وبس
محمود دَبلان وبدور بيتبص من الشباك
محمود بيشاور للي هناك وبيكتب… لأ..
وبدور بتحاول تكتب (حق) على الجدران
حقك هيضيع
……….. علشان إنسان في زمن بايخ
………….. علشان حلمك دايمًا شايخ
علشان دايخ وسط الحلاليف
حملتنا الجايه عشان نخلص من أي شريف
……. اقتل غلبان
