توب حداد – للشاعر محمد صبحي نصر – جريدة اخبار العالم .. مصر بين يديك

توب حداد – للشاعر محمد صبحي نصر
لحد إمتى يا حبيبتى مقيدانى محبتك
ولحد إمتى يضيق براحنا ….
وأضيع وأتوه من سكتك ؟
أنا يا حبيبتى مانيش هطيعك ..
ولا يوم هكونلك بهلوان !!
أنا مش هكون بس اللى خانك ..
خلاص شبعت من الهوان …..
ما أنا يا حبيبتى مانيش أسير …
ما كتير خانوكِ وقلبوكِ ونفضوكِ من الشعير!!
أنا يا حبيبتى ورغم إنى
مش باطيقك فى البعاد !!
لساني شايفك وانتى لابسه
تـــــــــوب حــــداد !!
لابسه ليه كل السواد ؟
وفوق دماغى مولوله
وبلازمه وبدون ما أنعزم على خارجتى
أنا ليه يا قاسيه بانعصر منك كتير ؟
أنا قلبى ليه كان لك أسير
أنا يا حبيبتى مانيش نبى
ولا كنتي لي زليخة اللى حبتنى
ومسيت شغافها …
ولاحد شافنى ولا حد شافها
{وقدت قميصهٌ من دبر}
وكأنها الوحش الذي
عايز فى لحظة ….
يدهس الكون والبشر !
مقطوعة ليه كل السكك ….
دايما مابينا مقفله؟
وما تحلفيش …
إن انتي كنتي مغفله
بالعكس … المغفل كان أنا
يا مكمله ….
فوق راسى دوسي واهرسي
يا محسرانى ع الرغيف اللى اتبرى
بفعل الزمن …
يادي الوهن … دا أنا لسه منك بنكوي
بنار الشجن … نار العطن
منهوبه ليه يا أم المحن ؟!
يا أم العطاشى المحرومين
الجوعانين العريانين المجبرين المطرودين
الأولين والآخرين …
منك براء …. ما بلاش هراء
وتعالي نحسبها سوا
ما أنا يا حبيبتى مانيش غبى
ياما طفت بيكى فى البلاد
وفديت عنيكى بالولاد
ورفعتلك راية الوداد …
ليه يا حبيبتي محملة همومك عليا ؟!
ومسلمة الراية لغيرى ؟
ولما باقصد أمدحك ..
تتمنعي ؟
وتسمعي الخلق الكتير …
عن حكاياتنا سوا …
وعن قلبي اللى قدمته هدية
ما باقولش غيري
أنا بس طالب إنك إنتى ف يوم تثوري
ثوري ليا ثوري فيا وهدهديني
وللا حتى هدديني بالبعاد
هتلاقيني ما بين إيديكى
بابتدى لحظة ميلاد
لحظة شروق العمر ليكى مرتين
خلااااااااااااص
أنا يا حبيبتي أكيد هاطيعك
وكمان هكونلك بهلوان
وهكون أسيرك …
وكمان نبي !!
بس اسمحيلي بكلمة واحدة ….
مش هكون بس
الغبى !!