مكتب اسكندرية – ياسر بدرى
كتبت : أمنية محمد
** لازم تكون عارف إنك هتفضل تبني وتعدل في شخصيتك لآخر يوم في عمرك و أهم شئ لازم تكون عارفه إن الحواجز النفسية هي أسهل شئ يتبنى وأصعب شئ يتهد ! وأصعب شئ لما يتبنى حاجز بينك وبين نفسك .. فخد بالك جدا من النقطه دي ! الحواجز لو اتبنت بينك وبين الناس .. مش هتتهد إلا بصعوبة كبيره ومجهود أكبر !
** كتر التسامح بيفيد صاحبه وبيأذيه في نفس الوقت .. بيخلي قلبه أصفى .. بس نظرة الغير ليه بتكون قاسية !! بيشوفوه ضعيف .. ومش بيهتموا بشعوره ..وبيستسهلوا الإعتذار له ! فحاول توازن بين العفو عند المقدرة وإمتى تاخد حقك بدون ما ترد إساءة بإساءة .
** الظلم مؤلم جدا لدرجة إنه ممكن يتسبب في موت الإنسان .. الشعور بالقهر زي المادة الكاوية بتكوي الجسد .. القهر برضو بيكوي القلوب !
** العظماء مش شرط يكونوا معروفين .. جايز جدا يكونوا في الأرض مغمورين بس في السماء معروفين. خليك عظيم وماتلتفتش لأي تفاهات !
** الحياة هتمر قدامك زي ( شريط السنيما ) بمجرد تتابع الصدمات في عمرك .. هتتعلم وهتقع وتقوم وهتبكي وهتضحك وفي النهاية هتتشكل شخصيتك اللي هي عبارة عن عصارة تربية وخبرات وأحداث كتير مرت بيك !
** لازم تكون سوي ..المجتمع مليان مرضى ومفتقدين الأسوياء
** القبح مش قبح الشكل .. القبح قبح القلوب ويا بخت من كان قلبه وسيم
** مافيش أصعب من إنك تكون مُصر على إنك تحترم ناس مابيحترموش حتى الحالة اللي انت فيها ! انت بتمارس تربيتك وهما بيمارسوا تربيتهم برضو .. دول ابعدهم عن حياتك
** مش عيب تضعف قدام الخالق .. ولكن قمة العيب انك تضعف قدام مخلوق مش هيعرف يحتوي حالتك
** جميل إنك تلاقي اللي ماتخافش من ظهور ضعفك قدامه .. تبت بإيدك و سنانك في الشخص ده 
** تعويض ربك مالهوش وقت معين .. لكن له وقع وتأثير مبهج على القلب لما بيحل عليه .. خليك دايما مستني عوض ربك .. مهما طالت سكة الإبتلاء.
