عارفة انتى بالنسبالى إيه
أنتى نسمة إنتى ضى
إنتى فى حياتى
ما ليكى زى
أنتى بهجة تملا المكان
أنتى عشقى إنتى الأمان
لو أوصفك أقول إيه
قدك. مين قدك
بستان زهور على خدك
والعيون تسحر
من غير إى كلام
بالهمس أسمع ردك
نفسى لحضنى أشدك
ده الشفايف تسِكر
من غير شرب حرام
ليكى بسمة تغير أى مود
ليكى ضحكة تخطى الحدود
معزوفة بحنية على عود
والعود اه منه العود
والرمش سيف ولّا الخدود
والصوت أحن من الكمان
منقوش إسمك على كفّى
وفّى نذرك ليا وفّى
ومن حنانك عليا شفّى
كونى دايما ملازمة صفّى
ده أنا من دونك شمعى مطفّى
من فوق ضهر الشمعدان
لفى دراعك حواليا لفى
وأسندى راسك على كتفى
غمضى عيونك ولا تِرفى
دفّى قلبك فى حضنى دفّى
نامى حبة أو حتى أغفى
وأرمى همومك فى النسيان
وائل البطراوي
