انت مش انت وانت غضبان
كتبت : نور الصباح
ليه بقى انت مش انت ولا انتش داري؟؟؟؟
لانك بتخرج بره شخصيتك الحقيقة وبتسلم نفسك للمشاعر السلبية وبتسلم نفسك للتفكير العشوائي وبتكون للاسف حد تاني حد غيرك وطبعا يافرحته وياهناه شوشو اقصد الشيطان ليه بقى هي دي فرصته انه ينفخ ويولع الدنيا وانت ياضنايا ولا انت داريان
كل القصة ان الغضب او كلمة الغضب جاية من فعل غضب يعني اتخنق تعب اتغاظ اتحرق هاج ثار
هاقولكم على حاجة انا مش بعترض على الغضب لان الغضب مشاعر طبيعية جدا يعني عاطفة طبيعية ازاي ؟؟
هاقولك ازاي اي مشاعر نحس بيها لازم نعبر عنها ونعيشها لكن اوعى تبالغ فيها لان المبالغة هاتوقعك في الغلط والغضب دا شعور طبيعي عيشه لكن متنساش نفسك وتضيعها في الغضب طيب
الغضب قلنا عاطفة طبيعية بسب التعب التوتر الارهاق رد على تصرفات سلبية تجاه الاخرين رد على موقف مهين او مسيء رد فعل لعدم تقبل الاخرين وعدم تقبل ارائهم رد فعل لتراكمات وبيحصل انفجار فجأة
وممكن الغضب يكون رد فعل طبيعي ومنطقي ومقبول وممكن يكون الغضب مبالغ فيه وغير منطقي وغير مقبول
ايه هي بقى انواع الغضب اول حاجة غصب مبرر
ودا نوع غضب اخلاقي بسبب تعرض الانسان للظلم
التاني غضب الانزعاج ودا اكثر انواع الغضب شيوعا
والنوع التالت الغضب العدواني ودا طبعا اخطر انواع الغضب وهو نوع مدمر بيحصل لما يرغب الانسان في السيطرة على الاخرين او تخويفهم او التلاعب بيهم
النوع الرابع وهو الغضب المزاجي ودا بيكون غير مبرر وغير منطقي لعدم تلبية الشخص رغباته من جهة الاخرين والنوع دا بيبدا من الطفولة وهو غصب الشخص عند عدم تلبية احتياجاته الانانية الغير مناسبة وغير مبررة مما يؤدي الي خسارة في العلاقات وبعد الناس عن هذه الشخصية وعدم القدرة على تكوين علاقات صحية وناجحة مع الاخرين
وطبعا كل دا بياثر على الصحة النفسية والحياة المهنية تاثير سلبي جدا
ازاي بقى اتحكم في غضبي؟؟؟؟؟
افكر كويس في الكلام قبل مااقوله عشان مااندمش بعد كدة امارس تمارين رياضية منظمة امارس تمارين استرخاء تفريغ المشاعر السلبية اول باول عن طريق الكتابة او الكلام مع حد موثوق منه اطلب المساعدة مش عيب والله دا ضروري جدا
عند الغضب احاول اتوضا او افصل نفسي عن الموقف وبلاش افكر في المشكلة بالعكس افكر اكتر في الحل واغير مكاني ودا طبعا توجيه نبوي لو واقف اقعد ولو قاعد اقف او اغسل وشي
ازاي بقى اتعامل مع الشخص الغضوب بالحكمة طبعا وبالصبر وعدم توجيه النقد او اللوم وعدم توجيه المساعدة بشكل مباشر ولو مقدرتش اساعد اسيبه لحد اما يهدا في وقت تاني اساعده بطريقة غير مباشرة
عرفت بقى ان انت مش انت وانت غضبان…!
