جريدة اخبار العالم
كتبت سامية بن راشد للشاعر الحلاج الكافي
“إن شاء الله احْنا الغابة
و يجُـونا الحَـطّابـــة 1”
و يدقّـــوا باب الدّار
و يلقـوا برشَا خضارْ
و يلقـوا خبـز و زيتْ
في ســـــدّة الـبيـتْ
و في الجَــرة قــدّيـد ْ
مَذخــورْ من العـيـدْ
و يلقوا قصْعة عَـصيدة
مهْــديّة في وديــدة
و يلقوا سُــفْـرَة كبيرة
و مثَـاردْ و ذخيــــرة
و يلقـوا عُـرْمَة دهَانْ
تشـبَّـعْ الجــــيعــــانْ
و يلقوا برْمه طبيخة
و دلّاعْ و بطّيخــــة
وزيـرْ مـن العَسلْ
يكفي النّاس الكُــلْ
يلـقُـوا مَـرى ودّادة
و عَـباينْ و وسـادة
و يلقـوا رجال كرام
ما حبّــوا الحـــرامْ
إذا دخلـوا بالقــفّة
حلالْ و خيرْ و عفّة
ينادوا: يا عِـلجـيّة
خوذي هَا الْ قَـضيّة
و اطبخِ في القازانْ2
و اكْرِمْ الضّيفان
و الطّفلة مُـفـيـدهْ
تعْـملْ الزُّقْــديدَهْ3
و افْـرشْ الحصيرْ
عَـنّا الخيرْ كثيـرْ
هامْ جُـونا الحَطّابــهْ
و برْشَا نَاسْ غَـرَابَـــهْ
واحْنا أهْـل خِـمِـيـرْ
و زدْنا حصَدنا الصّابَـه4
——————————————————————-
1- مثل تونسي يتمنّى فيه القائل ان يكون غابة من الخيرات و ياتي الجميع للاحتطاب.
2- القازان: إناء طبخ كبير.
3- الزّقـديدة: ما تطبخه البنات الصّغيرات من لحم يوم عيد الاضحى كتمرين على الطّبخ.
4- الصّابة : الحصاد الوفير .
————-
المهدي / الحلّاج الكافي
