شعر / إلهام عفيفي
وراجع ليا من تاني
بتسألني صحيح فاكراك ؟
انا فاكرة وكنت أتمنى لو انسى
انا فاكرة ف اول يوم تمثيلك
وصدقتك وطول الليل ادعيلك
وكنت اتمنى اكون الزيت ف قنديلك
وكان نفسي الف الكون ف منديلي وأديلك
رسمت حياتي ضلاية على رمشك
وكنت اتعشى من طيبتي ومن غشك
وتهدمني وانا بابني حيطان عشك
ما كنتش عارفة انك بحر بيغرق
وانا عايشة
ودلوقتي عرفت الفرق
عرفت انك ما حبتنيش ولا لحظة
وباحلف صدق
واسم الحق
انا ما عرفت عنك شيء طول عمري
وانا تايهة مابين ابني وبين بنتي
وماشي ورايا بتقس لي وبالسنتي
مشاويري
انا عايشة معاك بروحين
بروح مكسورة ع الاخر
وروح قادرة تهد الكون
بروح مكسورة من فكرك وعطشانة
دواها كف حنية
وروح عصفورة مهزومة
والف بارودة ع المية
ما حبنتيش
وعايش تكسر اضلوعي عشان تكبر
ولا راضي تسبني اعيش
وكل دقيقة بتكسر
عشان تكبر
ضلوعي ف زوايا البيت
وواقفة تسند الحيطان
ولا مرة ف يوم حنيت
ولا حسستني بامان
سرقت البسمة ف صبايا
بقى قلبي ف صدري عجوز
وتنساني وحتى وانت ويايا
دفنت من طموحي كنوز
وجاي دلوقتي وبتسأل
على قلبي.. ولو فاكر
وعمرك ما سألت ف يوم
عن القلب اللي عاش ناكر
نسيت.. يمكن
لكن قلبي.. أكيد فاكر
