كيف تصبح عضو مجلس شعب
متابعه. أحمد علي
١ فصل 5 جلبيات بلدي صوف غاليين بالقميص الأبيض اللي تحتيهم وشال كشمير محترم وبوس اى حد تقابلة
٢ – تروح أي عزا في الدايرة وتدخل من قدام حتي لو في قرايبك من هو أكبر منك سنا ومقاما وبوس اى حد تقابلة
٣ – تروح أي فرح دعيت إليه أم لم تدعي وتسلم علي كل الفرح اهل العريس والعروسة والمدعويين وبوس اى حد تقابلة
٤ – تتصرف ولو حتي هتستلف وتدبح عجل كل سنة وتوزعه علي كل الناس الباينة اللي ممكن تحشدلك أصوات وتبوس اى حد تقابلة
٥ – تسمع عن أي صلح تروح تحشر نفسك في اللمسات الأخيرة وتقعد من قدام وتبوس اى حد تقابلة
٦ – تسمع عن أي ست غضبانة تروح لجوزها وتسمع منه وتاخد حد من أهله وتصالحهم وتبوس جوزها بس اوعى تبوس الست
٧ – تنزل يفط كتير في العيد ودخول رمضان وتحط صورتك وتهنئ الامة الاسلامية وفي الاعياد المسيحية تهنئ الاخوة الأقباط تبوس الشعب كلة
٨ – اوعي تقرا سياسة عشان مش هتفهم حاجه واذا حد من المواطنين سألك أي سؤال سياسي ترد بإجابة واحدة ربنا يصلح الحال وتبوس المواطن
٩ – تمشي مع التيار لو الحكومة وفدية تبقي وفدي ولو حزب وطني تبقي وطني ولو تيار اسلامي تربي دقنك وتبوس الناس
١٠ – تسمع عن اي مدرسة هتتبني او اي شارع هيترصف تروح كاتب طلب وموديه الابنية التعليمية او مجلس المدينة وتدَّعي كذبا وزورا وبهتانا انك انت اللي عملته وتبوس المسئول
١١- أي افتتاح لأي مدرسة أو طريق أو شارع او مصنع علي طول تروح رايح وتحشر نفسك وتتصور وتبوس المحافظ
١٢ – أي مسجد هيتبني تروح وتدفع تبرع مالوش لزمة عشان تحضر افتتاح المسجد كإنك إنت اللي بنيته وتبوس المصلين
١٣ – أي فرصة للخطابة في أي مناسبة امسك الميكروفون وقول كلمتين مش مهم بوس
١٤ – تنتقد المستشفي بمناسبة ومن غير مناسبة وتبوس المرضى الرجالة بس المرضى الستات بلاش
١٥ – تصاحب الظباط وأمناء الشرطة عشان لو حد اتمسك
تروح تطلعه من المركز وتبوس المتهم
١٦ – لو الجلبيات دابوا فصل جلبيتين تانيين وتبوس الخياط
١٧ – عربيتك لازم تكون كبيرة ومحترمة ولو ماعندكش استلف عربية من حد تبعك عشان لما تروح عزا او فرح وتبوس بتاع المعرض
١٨ – ماتمشيش من غير ٥ او ٦ رجول دكك حواليك يعملولك جو وكده منبوسش دول
١٩- كل بلد تروحها تقوللهم ايه اللي ناقصكم ؟؟ يعني قال انت اللي ها تكمله مش مهم بوس
٢٠ – اي حد بيتفزلك وبيسأل أسئلة كتيرة وصعبة صاحبه بسرعه وخد تليفونه وقوله انت عجبتني عشان مخك حلو ونور عشان ينشغل بكلامك ويبطل يسأل ومتبوسوش دة هيضيعك
21- لازم تعمل دورة لكرة القدم بين شباب الدائرة وتكرم جميع الفرق وشويت هداية للفرق و شوية رحلات ومصايف ولاتنسي تكريم الام المثالية والزوجة المثالية والطالبةالمثالية وتكريم عدد كبير من النساء تحت اي مسميات..
22- وتصاحب طوب الارض وتقعد عالقهاوي وتلم شلة حواليك بحيث يكون ليك هيبة كدة وزيطة كدابة ودايما صوتك يبقي أعلي من كل الموجودين للفت النظر والانتباه وتبوس كل الناس على القهوة
و يا سلام بقي لو بتشرب شيشة كمان بتحس انك معلم وابن سوق وفاهم في كل حاجة وبوس الشيشة
23- وقبل كل ذلك تشوف واحد بيفهم في ادارة المعركة الانتخابية يتولي التجهيز ليوم الانتخاب وملكش دعوة بيه وتوفر له كل ما يحتاجه..
ونقولك مبروك سيادة النائب هات بوسة ترد علينا وتقول اما افضي ……مش كده والا حد معترض.
