للأديب والشاعر / محمـــد عســكــر
***************************
.أنا اللى علمت القلم
رسم الحروف….
وأنا اللى عاودنى الألم
ما أعرفش خوف
لو حتى أشوف
دمع الأنين اللى اترسم
فوق خد لهفة الإنتظار..
وألقانى بحلم بالإجابة على السؤال:
نفس السؤال اللى اتسأل..
واللى فضل…
ستين سنة….
من غير إجابة محددة..
العتمة ليه….
جوانا لسه ممدة..
والفجر عاجز ع الخلاص…؟
معقول خلاص !!
مافيش إجابة ف ردكم….!!
ساعات…
بألقى إجابة الأسئلة
لحظة تمام الحلم لأخضر
فى عيون السنبلة…
تطرح ندى..
تطرح نهار..
تطرح غناوى وفضفضة..
تطرح أمل….
تطرح وتجمع ع الورق
وبيتخلق…
موال جديد..
موال فرح..
موال يخلى الشمس تحضن فى القمر
ويحل لغز المسألة…
يرسم..خريطة للوطن
مافيهاش حواجز أو حدود..
من غير ألم..
وتاريخ يرجع للوطن
مجد الجدود…..
أه ياقلم..
نفسى أحضنك
جايز ألاقى ف ضمتك
وف دنيتك…
معناها أيه…
كلمة …..وطن…!!
……………؟؟!!
