قصيدة : شكرا يامصر
للشاعر /د/ باسل الصباغ
قصر ثقافة كفرالدوار بحيرة
الآه بتدوى زى ما بيدوى الرصاص
وكتير ناديتك بس مش قادر ..خلاص
قررت أسيبك جوا حلم فطفل متشرد يتيم
بينام على الأسفلت متدفى برصيف
ماسك رغيف
وينام يشوفك ماسكة ايده بدون فروق
ويعود ويصحي يضم بعيونه الشروق
فيلاقى واقع يكسر الحلم الجميل
عايش على أمل انه يرجع جوا ليل
فيعود لحلمه يطير لفوق
ممكن يدوق . . لحظة شبع
ويداوى قلبه اللى اتوجع
مالفرجة عالناس مالازاز
عايز يحس فلحظة واحدة بانه فاز
وايديه فى حلبة عمره مرة بتترفع
عيل جدع..
عيل غبي..
ما يهمهوش
هو اللى شافك بس انتى ما شوفتيهوش
وتمَلّى سايبه ايديه تسلم عالهوا
الحلم عمره ما كان دوا
والضعف عمره ما كان سبب
مركوب وعمره بيتغلب
عايش فى حلمه بينتصر
بالطبع لازم يقتصر .. كل الحياة فكام ساعة نوم
يرجع يقوم..
مستنى كل كابوس يفوت
علشان يعود.. حبة ساعات
خلصت وعوده ف طب مات
والصورة زادت ألف كسر
جربت أحبك بس مش قادر خلاص
شكرا يا مصر
