للشاعرة/ ســـــارة زيــــادة
حبة حروف .. تخاريف
كانت بتجمعنا
ندوب معاها ساعات
وساعات بتوجعنا
اتبخرت لاشواق
واتبقت اللعنة
يا هل ترى الأحلام
والفرح بقوا يامه
على حد قلبه تاه
دايب ف دوامه ؟
عاش عمره سُكَّر ضحكته
ملح ومرار
او نسمه تتسلِّل من بين شقوق الخوف
وكأنها قُبله حياه
طيب بلاش
ليه لما عاد للدنيا
برضو محسهاش
لقى شهدها دخان
واتدارت الفرحة
بالسجن والقضبان
صورتك ما بين الصور
متلغمطه ألوان
نفس الوشوش
حبه رتوش ع الورق
تحديدها مش إنجاز
ملامحها صابها العجز
منحوت بايد فنان
متشعلقه في رزاز
قلبي اللي كان جنتك
عاش فيك حياته سفر
من شهد عمره سقاك
سقيته سهد السهر
كل السنين بتمر
وعلقمك باقي
مهما بقول أنساك
ألقاك ف اوراقي
كل الجناين بور
من بعد أحزاني
ضي الصباح طارح
صبَّار كما اللبلاب
أشواكه أشجاني
طب جاي ليه تاني ؟
عشان تعيد الدور
كل الكلام مبتور
من جدره متحوِّل
طب كنت م الأول
متبعش أحلامي
بتمد ايدك ليه
وتفك ضفايرها ؟
تفردها ع الدنيا
.. وترجع تعايرها
مع ان احلامك
في الأصل من خيرها
الظلم غيَّرها
مبقتش انا هيَّا
بنوته يوم كنتها
جوايا مخفيَّه
متمرجحه ف جوفي
قاعدة ف عز البرد
تتدفَّى ف حروفي
ملقتش منك دفا
ولا ورقه ساترة العرض
قلبي الحزين بيئن
ومشاعري متكتفه
تتمنى تنهي العرض
صوتك قووي بيرن
و يلوِّن المشهد
كل الجموع تشهد
مين اللي بكَّاني ؟
قلبي اللي مات مدبوح
في نظرتك جاني
والصوت يشق الصمت
تايهين في 100 توهه
انا وانت صوتنا لبعض
دايما مهوش واصل
ايه اللي كان حاصل ؟
غير شمس مخفيَّه
عايزة تعدي الليل
وتطل م الميه
وتبل شفايفها
باللي انصهر فيا
طب ليه حياتي غروب
وانا بشتهي تشرق ؟
بستني فجر جديد
م الضهر للمغرب
ده مش ميعادها صحيح
انا ريح ف وش الريح
ويقولوا مجنونة
حلفت بإن الهوى
مش حاجة مضمونة
……….؟؟!!!
