الشاعر / مغــاوري ســالم كروش
حولوكي يااميره
ريح ونوه
وموج يهاتي
حولوكي بحر عاتي
راح يقلب
ف اللي غايب
واللي حاضر
واللي آتي
لما عرفوا ان شطك
شط رسيت
فيه حياتي
وان ذاتك لما تحيا
تحيا ذاتي
صدقيني لما اقوللك
واما باحكي لامسياتي
إني طيب
وان طيبتي
فرز واخد من صفاتي
من براءتي
من طفولتي
من كتابتي
ف كراساتي
واما كنت اشتاق بلاقي
حاجه فيكي محسساني
اني عايم
واني غاطس
يعني جوه الميه فارس
واما ييجي الضهر حامص
ارمي روحي
ف وسط موجك
ينفردلي
يكون حصيره
وتناديني يااميره
ياللا خطي
فوق ف شطي
لسه فاكره يااميره
بس لما حولوكي
يااميره
وانكشف لي
سر تاجك في البصيره
كل موجه بتجري فيكي
مره تعلي
مره توطي
مره تركب فوق حصاني
واللي كائن
راح مانسمع عنه سيره
حولوكي
صوروكي
فغير مكانك
شالوا اسمك
حطوا اسمك
لعبه تمت فالعصاري
لو تقولي اوتداري
مش حاتفرق
لو يخضك
ديب بيعوي واللا تعلب
داللي اعجب
فاللي جايلك
فوق دماغه السلطانيه
قال حاضمك للحراملك
فانسي اهلك
وانسي شكلك
وانسي كل ايدين
تطبطب
مانتي وسط الخيه
تايهه
صوت يبعبع
صوت يهبهب
صوت يلومك
صوت يشدك
صوت يزقك عاللي
اصعب
حملوكي فوق ماطقتي
فانقطعتي
فانقسمتي
فانهزمتي
واما عند الكل هنتي
انفجرتي
وانفجارك
فيه دوَّي
حولوكي
ريح ونوه
خاللو موجك
راح يهاتي
راح يقلب فللي غايب
واللي حاضر
واللي آ تي
والتقيتك
بحر عاتي
شفت ذاتك
ذات بتفصل
منها ذاتي
حتي شطك
لما رسيت فيه حياتي
كان تابوتي
كان مماتي
…….؟؟!!!
قصيدة : الطيب والاميرة
