رســـــــــــالـــــــة لـــــــكـَ و لـــهـــــــا
مهم إن الزوجين يكونوا متعودين يقعدوا كل فترة مع بعض بشكل شبه دوري (كل أسبوعين او تلاتة او شهر) … ويتكلموا مع بعض في الحاجات والمواقف اللي مضايقاهم في الفترة اللي فاتت .. او يرتبوا لشوية مصالح تخص البيت والأولاد… وياريت تكون القعدة دي في وقت هادي … او في البيت في وقت الدنيا فيه رايقة ولطيفة
فكرة إن لما يحصل موقف دلوقتي ضايقني .. وانا عارف اني هاتكلم فيه بعد اسبوع او اتنين في القعدة بتاعتنا…..ده بيساعدني اني أعدي الموقف دلوقتي … وبالتالي لما نتكلم فيه هانتكلم بشكل اهدى وأكثر عقلانية .
لكن لو احنا مش متعودين نقعد مع بعض …و انا عارف ان لو ماتكلمتش دلوقتي حالا… مش هاعرف افتح الموضوع تاني …وأحس ان حقى هايضيع … ده بيخليني أتكلم دلوقتي حالا حتى لو الوقت والظروف مش أحسن حاجة
في بيوت كتير بتتهد بسبب التراكمات … فلو الزوجين ماعندهمش طريقة يفرغوا بيها مشاعرهم السلبية … ممكن في لحظة البيت يشتعل على اهون سبب
مش صح اننا ناخد كل القرارات ع الواقف كده … في قرارات عشان تتاخد بشكل سليم ومريح للناس اللي عايشين في البيت لازم تتاخد من خلال مناقشة هادية ومترتبة
ملحوظة : الكلام اللي فوق ده عشان يكون ناجح … محتاج زوجين بيعرفوا أساسا يتكلموا مع بعض بشكل كويس ومليان ود ….وبينهم مساحة كبيرة من التغافل
لكن لو القعدة دي حصلت والكلام بينهم مليان حدة ومقارنات … وإلقاء اتهامات ….وفتح لمواضيع قديمة اتكلمنا فيها زمان واتصالحنا … والناس بتقف لبعض ع الواحدة…الخ … ساعتها القعدة دي هاتكون خناقة جديدة مش أكتر والناس هاتهرب منها.
لكن الحقيقة لو القعدة اتعملت بشكل كويس هاتكون سبب ان البيت يبقى مستقر بشكل كبير
سفيرةالثقافة والسلام
د.أماني الزيات
