جريدة أخبار العالم مكتب تونس
كتب عبدالله القطاري
للشاعر الشعبي/المهدي القاطري -الحلاج الكافي
شَــــامِـخْ .. بَنَـــاكْ صَــحِــيــحْ
طيـنْ ..و حَـجــرْ .. و شـجَـــرْ..
و زَعـْتــرْ مجَــاوِرْ شِـــيـــــحْ
ڨـُـلْ لِي مَنــــاشْ تـخَـافْ ..
دِيــــــــــــرْ الــكـــــــافْ ؟
و أنت مَـقَامِــكْ ـ ڨـلْــبْ ..
و عَـزيـزْ في لطْــــرَافْ
و أنتَ غَـنَــانَــا و شِـعْـرنَـا الْمـلـيــحْ
و أنتَ السّكونْ .. و الصّمتْ.. و التّصريــحْ
و أنتَ جبــلْ .. و ما يهــــزّكْ ريــــحْ ..
ثــلجَـك قُـطن الصّافي
و ريحَـكْ نسـيـمْ الشّــافي
و ترابِـكْ حبيبْ الحَــــافي
و ظِـلّـك غْـطانَـا الـدّافي
و اسألْ جبل “عُرْبــــاطة”
و اسأل جبــلْ “سَـــلاطة”
عـرْفوكْ حَــامي الكَـــافْ
و شافُوكْ سَـنَـدْ الكـــــافي
و مهْـمَا ذكرتْ أوصـــافْ
يخُـونْ اللِّـسَـــانْ أوْصَافِي
و يَــــا وادْ في “مَــلَّاڨْ ”
و يا وادنَـا يَــا “تَــــاسَـهْ”
نَحْكيـلكُـم تِـحْـــــڨَـــاڨْ
عَلى ديــرنا و جُـلّاسَـهْ
على غَـناءْ كُـلُّو أَطْــراڨْ
و على قَمحْ أَرضْ سَـراسَهْ
و على جبلْ كُـلّو أعْـــتَـاڨْ
مَنَاراتْ شُــوشَـة راسَــــه
و على طيورنا لَـفْـــرَاڨْ
لا تَصِيدَهَــا الغَـفَّـــاصَة
و على “ديرنا” العَنَّـــــاڨْ
وصلْ السّحاب و بَــاسَهْ
و على جوادنا السبّـــاڨْ
دڨْـداڨْ صَخــرْ عَــفـاسَـهْ
وهذا كلام الصّدڨْ و التَّـلميحْ
بلا لَـكـعْ .. و لا تجْــــريـحْ
ديرنا جبـلْ و ما يهٍـزّو ريــحْ.
———
المهدي القاطري/. الحلّاج الكافي.
تحياتي و شكري للمشرفين على مهرجان ينابيع الابداع بالكاف و الصديق مدير المركّب الثقافي السحبي المصراتي بالكاف نعـمان حبّاسي.
جبل الـــدّيــر
