السيد شلبى
ب الفاتحة للنبى
العالم ابتدا
والصبح من إيديكى
بيشرب النَدَي
ضُمِّيني يا امُ روحى
وكَبِّسِي جروحي
بِ ضِلَّة م الشجر
وضى م الخَلَا
وحِفنة من دُعاكى
ف آخر الصلا
ضُمِّيني حُضن غَلَّة
مزروعة بالحلال
وِأَكِّلِيني لُقمَة طَرِيَّة للعِيَال
وِاملِينى قُلِّتِك
وِرُشِّي من طِحِيني
ف تِبن بقرتك
وحَنِّنِي الحَنِين
من ضرعها اليمين
وحنني السنين
من ضرعها الشمال
وُسَمِّي واحلِبِي
ب الفاتحة للنبي
الفاتحة للى جانا
والفاتحة للي راح
الفاتحة ع الشَرَاقِى
و مية المَسَاقِى
وشَتْلِة الصَبَاح
وفرحة اليمامة
بِفَردِة الجناح
وندهة المناجل
لراجل ابن راجل
يِحَاجِى ع اللى باقى
و ينده السواقى
تِدُور لوحدها
وِتِقرا وِردَها
والفاتحة للنبي
