بِقلم : رجا الأشقر ( كاتِب وشاعِر )
شو صَار حَتّى مْكَثّرِي/ه الفَتْحَات
مَشغول بالي جِيت تا إِسْأَل ؟ ..
وتا كون راضي وشِيل هالوِسْواس
عْمِلْتْ قاضي وقِلْت
بِحكي بلْسَانْ النَّاس
شو عْلَيّ لَو اسْتَفْسَرت ؟ ..
يا بقْنَعْ وبْتِنْحَلّ
يا بسْكُتْ وبِزْعَل
جَاوَبِتْ :
ما يْكون عِندَك هَمّ
فِيهُن ما عَاد تهْتَمّ
وتا رَيّحَكْ عَن جَدّ
وما تْظَلّْ محْتَدّ
هَوْ مَلْعَبْ النَّسْمات
مْرايِة الغَيمات
مَضْجَع النّور ومُتَّكَى النَّظْرات
حْوَاضْ وَردْ وفِلّ
مَمنوع إِنّي شِمّ
شْوَيِّة هَوا يا عَمّ ؟ ..
مَلّيتْ المْسَكَّر
وحَتّى ما يتْعَكَّر
هَالمزَاجْ نوِيت لَوْ ما حْكِيت
بَعد الشَّقا والهَمّ
قَصْقِص الدَّرزَات
وشو هَمّ الحْكايَات
ما دَامْ باقي بَعد شي مْسَتَّر ؟ ..
بَسْ أنا ما نْسِيت
راح قول شي أَكْثَر
صايِر مَعي بِالذَّات
عالطّرقَات
بالضّوّْ العْيون عا جِسمي
البَسْمات مرْتِسمي/ه
مِنْ مَيْل في غَمْزَات
في هَمْسَات
في آهات
ومِنْ مَيْلْ في رَغْبَات
سَاكْني/ه بِمْحَلّ
وما بْتُخْطُر عْلا بَال
وبِالعَتْمْ ياما رَدّدوا إسمي
وشَرّعوا التّهْمي/ه
وتْوَشْوَشوا وقالوا شو هَالمَنْظَر
راح إسْألَكْ بَعد
هالشّي ما بِيسِمّْ ما بْيِقْهَر ؟ ..
وباقي بَعد أكْثَر
باللّيل بَسْ إِفْتَح الجَوّال
يا وَيْلْ .. في شي ما بْيِنقَال ! ..
قِصَص ورْوَايات
صَعبْ تتْخَبَّر
ولايكَات فَوقْ ما تتْصَوَّر
ووَرداتْ مرسومي /ه
وقْلوب مَلغومي/ه
وْلَهْفِي/ه ما إلها طَعْم
ووَهْم وخْيَالات
اسْمَعني قَبل ما خَلِّص الكِلمات
في ناسْ بثْياب محْتِشْمي/ه
بْتُبرُمْ على رِجّال
وبْتسْتِرا العَتْمي /ه
وفي ناسْ هِيّي بْتُسْتُر ثْيابا
وعِنْدها عِفّه
وْشَرَفْ ما بْيِنْطال .
بيروت لبنان
14/11/2021
