بقلم /ايمان جمال الدين
برغم ألمه هون علي أمه بكلمتين
كان كل همه يطبطب عليها بجملتين
بلغوا أمي ابنك مات راجل ومات شهيد
وللشهاده كنت ناطق وقولتها من غير تنهيد
ولما أمه جالها خبرة سجدت لله ركعتين
اشتكتله فيها من الكفره ونزلت منها دمعتين
صرخت قالت البياده بتاعت ابني
فرده جاتلي والتانيه راحت فين
وآآآه ياربي كنت بربي واحلم اشوفه في يوم عريس
واشوف ولاده يحبوا يجرو جنب مني موانسيني
وحلمي يارب اصبح كابوس
يوم ما بعته يخدم بلده ولفرحه كنا مجهزين
جاني النهاردة مزفوف في نعشه جاني طاير من العريش
صوته عالي في ودني غالي مات بطل مات شهيد
مات بطل كاشف وشه وفاتح صدرة في وش اولاد ابليس
هتروحو فين من ربي انتو يوم العرض ويوم الدين
يوم ما تقفوا ادامه تبكوا وتقولوا في الدنيا كنا مغيبين
انا اليوم مزفوف شهيد في الجنه اكيد هعيش
واللي يصبر قلب امي اني بطل واكيد ليها هكون شفيع
قولي انت ياجبان يوم قيامتك وانت بيستغيث
من هيبص ليك ويشفع مين هيبيع غالي بالرخيص
