أريد حرفا – أحمد راشو
لما كنت زمان صغير
كنت بلعب بالحروف
كنت ألخبطهم تملي
حتي قدام الضيوف
كنت أقول عالوزه بطه
والغزال عندي خروف
كنت ألاقي الناس بتضحك
أنشكح وأضرب كفوف
بعد ماكبرنا شويه
قالوا ياله عالمدارس
جمعوا حروفكم بسرعه
بس ساعتها كنت حايس
أكتشفت يوميها فجأة
أن حرف الراء ده ناقص
قولت هانطق ياء مكانه
مش مهم خلاص بناقص
ومن ساعتها صبحت ألدغ
عندي دايما حرف ناقص
عدت السنين عليا
رائي ياء ماقلبتهوش
والأساتذه غلبوا فيا
بس شكله ضاع في حوش
أي كلمه فيها هو
لو هاقولها مايفهموش
عندهم حق الصياحه ( الصراحه)
حاجه محتاجه لجياحه ( لجراحه)
حتي لو أخدتلها ياحه ( راحه)
يفتكرني بقول قباحه ( لا دي مافيهاش راء 😂)
لكن أعمل إيه ده قديي ( قدري)
أني أبقي الدغ ياعميي ( عمري)
لا وإيه شوف من بجاحتي
رايح أكتب شعر عامي
طب ياسيدنا أزاي تقوله
مين هايرضي توصفوله
دانت لو قولته في فيديو
هايضحكوا الليل بطوله
روح يافندي شوف حروفك
واما حرف الراء يجيلك
أكتب الكلام وقوله
#Rasho
