إسمعني و يا ولدي

رفيق بالرزاقة/تونس.

مهما صعبت العيشة و قسات علينا
لازم ربي يرحمنا و يهنينا
دوام الحال من المحال
و الشدة في العالي مغير الأحوال
يلزمنا نتعلقو بالأمال
و نلقاو إجابة على السؤال
آشبيه برشة ناس تعبانة
و نسبة منهم عايشة مطمانة
زعمة هكة باش يدوم الحال
يظهري صعيب نجاوبو على ها السؤال
صحيح كلو مقدر و مكتوب
و العلم عند علام الغيوب
لكن الواحد يلزمو ياخذ بالأسباب
و يتوكل على الله التواب
ثمة الحظ يفتح الأبواب
و بالخدمة نتغلب على الصعاب
و ربي يهني كل الأحباب
و يقوي العشرة بين الأصحاب
الدنيا هكة يا وليدي
و ربي معاك يا كبيدي
حط في بالك طاعة ربي
و بالأخلاق تولي مقدي
إحرص باش تكون متربي
و ركز في قرايتك يا ولدي
باش تحقق أمانيك
و تفرح روحك و والديك
قيمة الإنسان في أخلاقو
و قدرو يعلى بشهايدو و بعلمو
هاني وصيتك يا عزيزي
راك ولدي الغالي و حبيبي
ربي يرفع قدرك للعلالي
و تنال ألي في بالك و بالي