قصيدة {إنت مصري}
كلمات / أيمن البكري
لو سألتك إنت مصري تقولي إيه
قولي مصري إبن مصري
وإبن مصر إلي ياما إداس عليه
هتلاقيني عسكري شرطه
لو جاتلي رصاص مت
تمني يدوب خمس تلاف جنيه
هتلاقيني عامل ف شركه
مرتبي شوية فكه
حقي مضيعينوا ويطردوني
لو طالبت بيه
هتلاقيني عايش ف عشه
الدنيا معايا أفشه
سني بقا خمسه وتلاتين
ولا إتجوزت ولا خلفت ولا عملت ف حياتي أي شئ
هتلاقيني عاجز بشحت
بيتي ف الشوارع
سريري علي الرصيف
حلم عمري أربع حيطان
وبطانيه ورغيف
هتلاقيني علي كل شكل
مليان هموم وفكر
والفقر شبح مخيف
بس مع كل داه
بقول الحمد لله
……مصمم إني أعيش شريف
