أنا حد بسيط
أنا شئ بيدور على ضده
أنا خيط مفرود
يتعقد لو حد يشده
أنا آخرى أكون
شخبطه ع الحيط
أنا ضلمه ونور
أناقلب لطير
كاتم احزانه ومعدى
وفى وسط براح الكون
ورقة بردى
أنا كلى حياة.جوايا سكون
أنا حبة خير
أنا جنة ونار
جوه اللوحة حبة ألوان
اللون الأبيض يوصفنى
أنا شوق وحنان
بضحك وابكى
جد على هزار
أنا جوه الصورة
عاقله ومجنونه
بسهر للصبح وانام بدرى
وكتير مشحونه
بغضب من كلمة ومن موقف
مع انى صبوره
أنا صعب اتكلم عن نفسى
أوقات عنديه
وكتير طفلة بجد بريئه
حتى دموعى مش بايديا
وبحير كل الناس فيا
لو قولت أهزر من نفسى
أنا حبل متين
انا لما اتعب ببعد واهرب
بضرب للدنيا التكشيرة
وتاخدنى الأحزان لبعيد
تكره وقتها منى تقرب
عارفين انا مين؟؟؟
أنا حد بسيط
أنا آخرى أكون
شخبطه ع الحيط
