وفين نلاقى الوفا
والضمير معدوم
وفين نلاقى الصفا
والهموم بالكوم
وفين نلاقى الدفا
والجو كله غيوم
يا سنين بسرعة ريح
كل القلوب مجاريح
القهر فينا يطيح
ما شبعش فينا دبيح
واقفين على التصريح
و ناخد لقب مرحوم
معدش فيه احباب
عايشين كما الأغراب
قافلين علينا الباب
إحساس عديم كداب
و وهم كله سراب
حوالين الحقيقة يحوم
أدا واحد عاش حياته سلام
إتحمل مرارة الإيام
صبر ليحقق الأحلام
وأستقوى بالإلهام
حكموا على حلمه بالإعدام
وقع ما قدرش يقوم
وأدى صبية كان أملها كبير
ناجحة وبالتقدير
كان مناها تكمل المشاوير
تاخد لقب دكتور وخبير
خد مكانها أبن مدير
وأبوها مات مهموم
العيشة صعبة نار
وحرارة الأسعار
جابت لنا دوار
لا لحمة ولا خضار
خِلصوا يا ناس م الدار
والفقر عودنا نصوم
وائل البطراوي
