متابعة – وفاء الدرمللى — سوهاج
من لحظات أعلن د.”أشرف زكي” نقيب المهن التمثيلية عن وفاة الفنان القدير “يوسف شعبان” عن عمر 90 سنة.. واحد من أبرز أعمدة الدراما والسينما في مصر والعالم العربي على مدار أكتر من 50 سنة..
الوفاة حصلت بعد أيام بسيطة من إصابته بـ فيروس كورونا واللي بسببه كان بيتلقى الرعاية الطبية في واحدة من المستشفيات لإن حالته كانت محتاجة متابعة مستمرة..
اتولد “يوسف” في حي شبرا في 16 يوليو سنة 1931.. والده كان بيشتغل مصمم إعلانات مشهور وله اسمه في “إيجبشان جازيت”.. كان حابب يدخل مجال التمثيل من بدري بس أسرته رفضت وخيروه بين إنه يدخل كلية البوليس أو الكلية الحربية.. تحت تصميمهم دخل الكلية الحربية بس سقط نفسه فيها!، فخلّوه يدخل كلية الحقوق جامعة عين شمس في القاهرة لكن سابها برضه عشان ماكنش لاقي نفسه فيها!.. كان واضح مدى تمسكه بحلمه للنهاية ورغم السنين اللي فاتت من حياته في بدايتها في لخبطة الاستقرار على كلية ماكنش ده فارق معاه لإنه واثق إن حلمه هيتحقق..
دخل المعهد العالي للفنون المسرحية واتخرج منه سنة 1962.. أول بطولة له كانت في فيلم “في بيتنا رجل” مع النجم الكبير “عمر الشريف”، ومن هنا بدأ مشواره اللي تخطى حاجز الـ 110 فيلم منهم: “أم العروسة”، “ميرامار”، “معبودة الجماهير”، “مراتي مدير عام”، وغيرهم..
رغم إن أفلامه عددها أكبر بس بصمة “يوسف شعبان” في الدراما التليفزيونية كانت تأثيرها أكبر خصوصاً إن الجمهور بيتعلق بأبطال المسلسلات بسبب طول حلقاتها.. مين ينسى أدوار زي الحاج “سلامة فراويلة” في مسلسل “المال والبنون” الجزء الأول، أو دور “درويش” في مسلسل “الوتد”، أو دور “وهبي” في “الضوء الشارد”، أو دور “محسن ممتاز” في “رأفت الهجان”!، وغيرهم.. أكتر من 30 مسلسل كلهم مهمين وعلامات في تاريخ الدراما العربية.. ومش هستغرب لما نعرف إنه وبسبب موهبته المميزة شارك في المسلسل الأردني “وضحا وابن عجلان” واللي يعتبر أكتر مسلسل مشاهدة في الدراما الخليجية والأردن وسوريا..
بسبب شخصيته المحبوبة في الوسط الفني اللي كان بيقدره جداً تم انتخابه نقيب للممثلين دورتين متتاليتين بدأت في 1997.. قدر خلالهم يسدد كل ديون النقابة، وانشأ نادي كبير للفنانين في القاهرة، وعالج ناس كتير من الوسط الفني ماكانوش قادرين يدفعوا تكاليف العلاج..
“يوسف شعبان” فنان قدير ومهم فقدناه النهاردة بس هتفضل سيرته وأعماله محفورة في القلوب والأذهان.. ربنا يرحمه ويغفرله ويرزقه الجنة.
