للشاعر/جرجس انيس
يام محمود شدى حيلك
وادعى لابنك بالنعيم
ده اللى خد منك خليلك
بكره هايدوق الجحيم
احنا اسفينلك يا امى
والله همك زاد فى همى
قومى صلى وقومى سمى
ربك العادل رحيم
يام حوده يا بنت بلدى
روح ضناكى فى حق جيل
جايز الموضوع يعدى
جايز المسنود تقيل
بس لو جه الحكم هش
واللى موت عاش ما ماتش
فيه اله صاحى وما نامش
وانه ينسى ده مستحيل
يام اخويا واخو الجميع
ابنك الواد مات شهيد
حقه لو هنا راح يضيع
م السما القصاص اكيد
كلنا بننعيه فى موته
مشتاقين جدا لصوته
بس وحياتك سكوته
تمنه احزان عالبعيد
يام محمود كل طعنه
خدها ابنك راح تكون
نار جحيم ولهيب ولعنه
عاللى عايشينها بمجون
اللى دقتيه هايدوقوه
والوجع يوم هايشوفوه
بس وقت ما هايلاقوه
وجعته ماتكفى كون
يام محمود كل شعبك
للسما رافعين ايدين
والجميع بقوا كل اهلك
قبط او م المسلمين
القلوب طالبين قصاص
والقصاص بدء الخلاص
والخلاص عدل واساس
م الجبابرة المعتدين
………؟؟!!
جرجس
