قصيدة : مش منطقي
الشاعر : اسلام رمضان
قصر ثقافة كفرالدوار
مش منطقي يوم الرحيل اني افتكر..
ما تصدقيش..
كل الكلام الحلو قدام الحقايق
ما تصدقيش..
خلقي اللي ضايق
كلمتين الشعر/ أصحاب الدقايق
ما تصدقيش
ـــــــــــــــــــــــــــــــــــــــــــــــــــ
ممنوع ومش مرغوب
حدف الكلام كالطوب
قلبي اللي كله كسور
فجأة صبح منصوب
عليه…
ـــــــــــــــــــــــــــــــــــــــــــــــــــ
صاحبي…
صاحبي اللي أحوَج للبكا منِّي
طبطب على قلبي.. ابتسم لي وقال:
لو كان بإيدي الدنيا ما تغلاش
اتباعنا قدام الرخاص ببلاش
طبطبنا برضه بإيدنا عالأوباش
يا صاحبي صبرك.. كلها ساعتين
ــــــــــــــــــــــــــــــــــــــــــــــــ
مديت يا رب إيديا قاصد رحمتك
نارهم تهون يا رب لاجل محبتك
وانت اللي عالم سر كل الناس
يرضيك يا ربي وانت ربي.. انداس؟
ـــــــــــــــــــــــــــــــــــــــــــــــــــ
طول عمري دمعي مش اعتراض
وعشان أقوم بقنع في نفسي بإني ظالم
لو حتى ظلمي ده افتراض
علشان أكمِّل
أحيان كتير بتهزّ من سوء الظنون
واهرب
زي العيال الـ.. عاملين عاملة
شاطر في ضرب الفلسفة بجملة
فاشل في ضحكة كدب تداريني
وقت الغلط
يا رب انت القادر الجبار
اجبر بخاطري يا رب
من الحزن عدِّيني
