السلام عليكم ورحمة الله اعتزر لكم عن عدم التواصل الفتره الماضيه وإليكم مقالي اتمني يحوز اعجابكم وهو عباره عن حوار بيني وبين شاب اتاني مريض (((جيل يعدم بدم بارد)))

هو شاب في ريعان الشباب وقوته لم يتعد العشرين من عمره ابيض وسيم مهندم يتمناه كل اب وكل ام ان يكون ابنا وخلفا ينتظره مستقبل باهر في الجامعة يدرس بكلية محترمة جدا ((ابن ناس !! وكلنا ولاد ناس))
هو :- الحقني يا دكتور كتفي مخلوع
انا :- عرفت إذاي ! إتخلع منك قبل كده؟
هو :- آه كتير

قمت بالكشف عليه وفحص الاصابه وعمل اشعه علي الاصابه ورددت الخلع بسهوله جدا (مما يؤكد أنه خلع متكرر )
قلت له انت محتاج عمليه لكتفك علشان مايتخلعش تاني
هو :- انا عارف لأني انا عامل عمليه لكتفي اليمين علشان كان بيتخلع برده كتير قبل كده
انا :- بإستغراب شديد ؛؛احكيلي كتفك اتخلع إذاي أول مره ؟؛
هو :- الاول كان كتفي اليمين بيتخلع وعملت ليه عمليه وبعدين كتفي الشمال بقي يتخلع
انا:- انت عندك صرع أو بتجيلك تشنجات ؟ وكتفك كان بيتخلع من نوبات الصرع والتشنجات ؟؟؟؟
هو :- لا يادكتور بصراحة اصل انا كنت باخد ترامادول ووصلت لاني كنت باخد شريط في اليوم فيه ١٠ أقراص وكان أعلى بيحاولوا يمنعون فكان بيجيلي تشنجات لما كانوا يمنعوني عنه ويعدي ميعاد الجرعه
انا :- ترامادول تركيز كام ٥٠ مج والا ١٠٠مج
هو :- ترامادول مستورد (قصده مجهول الهوية تحت السلم يعني ) ٢٢٥مج
انا:- انت تعرف ان الحد الاقصي لتركيز ماده الترامادول في الجسم ٥٠٠ مج وانت وصلت الي ٢٢٥٠مج يوميا ؟؟؟؟؟؟ وده خطر جدا وممكن يعمل نزيف ويموت ؟
هو :- ساعات كنت باخد ١٢ قرص ودخلت مستشفي واتحجزت واتعالجت وصرفت اكتر من ٣٠٠٠٠جنيه السنة اللي قبل اللي فاتت وعملت عمليه في كتفي اليمين كلفت اهلي ٣٥٠٠٠جنية
انا:- طيب مفصل الكتف الشمال بداء يتخلع امتي وإذاي ؟؟
هو :- لما رجعت تاني اخد ترامادول من سنه واتخلع مني كذا مره بسسب التشنجات لما كانو بيحبسوني علشان ما أخدش الجرعه
انا :- رجعت ؟؟ ؟؟؟ يا دي المصيبة ! رجعت إذاي؟؟؟؟
هو :- لما اتعالجت جسمي زاد وتخنت واصحابي كانوا بيتريقوا عليا ويقولولي تخنت ليه كده ؟! وبقبت عيل سيس وكانوا لما بقعد معاهم يقولولي خد ماتخفش واحده مش هاتفرق؛ لحد ما رجعت تاني
انا :- مين في البيت يعرف انك رجعت للترامادول؟؟؟
هو:- امي
انا :- أمك؟؟؟؟؛ إذاي؛؛؛؛؛؛؛
هو :- أمي بتحبني قوي ومش قادره تمنع عني الفلوسلأني بتعب قوي و باخد منها يوميا ٢٠٠جنيه وساعات بجيب علبه علي بعضها اشيلها فوق الدولاب واخد منها وابويا عرف اني رجعت اخد تاني بس هو فاكرني باخد قرص والا اتنين بس
انا:- امال بتاخد كام دلوقت ؟وسعر الشريط كام؟
هو :- ١٢قرص في اليوم وبجيب الشريط من واحد ب٦٠جنية ولما يشح بيوصل ١٥٠جنية
انا :- طيب وبعدين ؟؟؟؟
هو :- ابويا هايخدني في اجازة نص السنة علشان اتعالج تاني في مشتشفي ابو العزايم
انا :- معاك في الجامعه حد كتير بياخد ترامادول ؟
هو :- انا بيتهيئلي الجامعه كلها ترامادول
في الامتحان اللي فات طالب كان واخد ترامادول (حقن وريد ) في دراعه ووقع في الارض وشالوه والحقنه متعلقه في دراعه
انا :- لا تعليق

((( جيل بأكمله يعدم بدم بارد )))