هو الحب إيه يا سادة
غير حد يحس بيك
ويشيل فى همك
غير حد يبقى ليك
فى عز الأه يضمك
غير روح لروح بتروح
فتطيب بها الجروح
فى حضنها البُكى مسموح
تعطيك الأمان لو تضمك
هو الحب إيه يا سادة
غير إنك تعطى من غير مقابل
إنك تسامح على غلطة لحظة ضعف
إنك وقت الغضب تتجاهل
إنك وقت العوزة تكون فى أول صف
إنك تشترى الخواطر إنك تجامل
إنك وقت العين ما ترف
تكون سند . فى الشيلة شايل
الحب يا سادة
مش صورة وكلمتين فى شات
الحب بين أتنين يفهموا بعض
من نظرة وقت السكات
الحب عطاء الحب تنازلات
الحب وأنت فى عز ألامك
لمسة إيد تعطيك قوة تعطيك ثبات
الحب وأنت بعيد رغم الحمول
ما تفارق قلبك ووجدانك الذكريات
الحب يا سادة أشياء كتير
تعشق… تغير تحب بضمير
تعمل حاجات من غير تفسير
وتبعد عن حاجات بتحبها
من غير زعل ولا تكشير
الحب……………… رقصة قلب
مجرد سماع صوت من تحب
وائل البطراوي
