مورفين العك
البشر
من يوم ما رجلي خطت ع الدنيا
وانا مابشوفشي غير عك
وعرك في حواري الكوكب
وجواري وبهلوانات لزوم الفرك
في حيطان السيرك
اللي اتحشى زمان في ٱدمغة
حجر من مورفين العك
أنا عقلي كثر ما حك
في جدران الطوب الاحمر .
اتعود يستحمر
اتعود يتعك
أنا مفيش مرة عديت من زحمة
الا ولقيت فيها دعك وشك
بين اليقين والشرك
و السك علي قفا الاحلام
أنا وجودي صبح حرام
مع غياب الضحك
مع لعبكة الايام
اللي مش لاقيلها فك
عمري ماشفت الجنة
اناعمري ما ضحكت
عشان أنا ما إرتحت
أنا عقلي انعصر
م الرغي وكتر التفاهات
والعاهات
وبوز السكات
اللي طبع علي وشي
وعلمني
ما أشوفشي غير الارض
أنا صاحبت طوب الارض
مع اني كتير بشوطهم
من كتر الوحدة
أنا وشي صدى من كتر الدمع
اللي انساب ع الخد
وماتمسحشي
تقريباً أنا مابقاش علي لساني
غير كلمة معلشي
شعر
محمد علوان
