موجعة جداٌ
فى دار المسنين
بعد مرور كام سنة
فى دار المسنين
كلها بُعد وجفا
وألام وأنين
طلبت من أبنها تشوفه
نفسها تقوله كلمتين
قالتله حبيبى وإبنى
ونور العين
ربنا عاطيك من وسع
والحالة حلوة وزين
ف ليا كام طلب
أشكرك لو تقولى أمين
حاجات بسيطة كده
مش هتكلفك ملايين
أحسبها من زكاة مالك
ولا مصاريف زوجتك وعيالك
ولا من ميراثى إللى سيبالك
أو حتى بالدين
كنت محتاجة تلاجة
فيها أكل كتير
محتاجة تكيف ومراوح
بطاطين وسرير
الدار محتاجة سباكة
وصيانة وأمور كتير
معلش يا حبيبى
أصل ياما نمت جعانة
وبردانة والأمر خطير
والعمر ما باقى فيه يا أبنى
ده العمر قصير
يللا حُسن الختام
ما باقى غير القليل
وفى قبرى لوحدى هنام
من غير ونيس وخليل
حن الولد وقال
ليه يا أمه من زمان
ما قولتيش
والدار من غير أمان
وكل حاجة مفيش
قالتله يا حبيبى أنا أتعودت
وعرفت أتأقلم و أعيش
أنا خايفة عليك أنت
لما ولادك يجيبوك هنا
فى لحظة طيش
بس خلاص
وائل البطراوي
