“القلوب السوداء لا ترى إلا ظلامها”
بقلم: المستشار الإعلامي والسياسي خميس إسماعيل
—
القلوب السوداء لا ترى إلا ظلامها
بقلم: المستشار الإعلامي والسياسي خميس إسماعيل
كل حاجة ليها علاج إلا سواد القلب،
اللي بيتعامل معاك بنية سيئة، عمرك ما هتقدر تفهمه، ولا ترضيه، ولا تتجنب أذاه إلا بالتجنب والبُعد.
سواد القلب بيعمي صاحبه عن أي خير ممكن تعمله،
كل أفعالك هتتفسر ضدك، وهتتلام، وهتتحط في موقف الدفاع عن النفس حتى في أتفه الأمور.
والحياة أقصر من إنك تضيعها في موضع المتهم دايمًا، وتبقى مضطر تفسر وتبرر..
إحنا مش مسئولين عن فساد نفوس الآخرين، ولا عن سوء ظنهم، ولا عن قلوبهم المريضة.
الحياة محتاجة قلب أبيض، صادق، يعرف يفرّق بين الطيب والخبث، ويشوف النور حتى وسط العتمة.
أنا وقلمي وقهوتي
أنا وقلمي وقهوتي.. ثلاثتنا بنفهم بعض كويس،
القلم بيفضفض عني لما الكلام يعجز،
والقهوة بتهدي الوقت لما الدنيا تضيق،
وأنا بين الاتنين، بحاول أكتب الصدق زي ما هو،
من غير تلميع ولا تزويق..
بكتب عشان أرتاح، وعشان اللي زيي يلاقوا في كلماتي نفسهم،
وعشان لما أقفل الدفتر، أكون سايب ورايا أثر يشبهني.. نضيف، حقيقي، ومليان حياة.
وفي الختام
سيب القلوب السودة في حالها،
واحمي روحك من طاقاتهم السامة،
وخلّي مساحتك مليانة نور، وناس شبهك،
ناس بتفهمك من غير ما تشرح،
وبتحبك من غير ما تبرر.
عيش طيب، وامشي مستقيم، وسِب اللي بيغلط فيك للزمن،
فهو أعدل حَكم.
