سر هروب الاعلاميه ريهام سعيد

كتب اشرف مروان الدويرى
هروب الإعلامية ريهام سعيد والقبض على غرام عبد الفتاح من طاقم العمل لدى الإعلامية ريهام أين ذهبت ريهام وما السبب فى إلقاء القبض على غرام
اللى فى الصورة دى غرام عبد الفتاح عيسي من مركز ابوحمص خريجة كلية التجاره العام الماضى جامعة دمنهور .. اشتركت فى فريق اعلام من شباب وفتيات كانت شاطره ومجتهده جدا رغم انها مش دارسه اعلام طموحاتها كانت كبيرة سافرت للقاهره للبحث عن فرصة عمل فى اللاعلام ربنا وفقها وخدت فرصة عمل مع المذيعه منى عراقى فى برنامج انتباه
طبعا نوعية العمل فى البرامج دى فى خطوره شويه وعايزه حد فاهم شغل الاعلام صح لانها بتكشف قضايا وفساد فطبعا بيكون فيها قضايا واتهامات ..
المهم انتقلت غرام للعمل مع ريهام سعيد فى برنامج صبايا الخير وحازت على ثقتها وثقة اسرة البرنامج طموحها كل يوم بيزيد وعايزه تثبت نفسها اكتر ..ريهام سعيد طلبت من اسرة الاعداد تجهيز حلقه عن مسلسل خطف الاطفال اللى الناس بتتكلم عنه وتم تكليف غرام بالتواصل مع احد الاشخاص عن طريق رئيس تحرير البرنامج والمخرج بالفعل غرام كلمت هذا الشخص بتكليف من رؤساءها فى العمل الشخص دا بلغها انه يعرف اتنين من اللى بيبيعوا الاطفال وممكن يوصلها بيهم على انها بتشترى عشان ما يشكش فيها وفعلا عملت كده
عشان تعمل سبق وتسجل اللقاءات وتوثق شغلها وتذيعه فى البرنامج كنوع من كشف قضايا الفساد واتفقت معاهم على مبلغ 300 الف جنيه للطفل الواحد وحددت لقاء معاهم طبعا كل دا متسجل بالصوت والصوره
اسرة البرنامج بلغت الشرطه عشان تقبض على الخاطف وتم ترتيب كل ده من خلال مخرج البرنامج ورئيس تحرير البرنامج بالفعل تم القبض على الخاطف واستعادة الطفلين وتسليمهم لاهلهم ..
لحد هنا تحيه لكل من ساهم فى عودة الطفلين سواء البرنامج او الشرطه ..
وتحية خاصة لغرام عيسي بنت الريف بنت محافظة البحيرة الجدعه اللى خاضت التجربه مع مجرمين وفى اجواء مرعبه وماخافتش من عواقب الصدام مع مجرمين وعصابات منظمه ..
اتذاعت الحلقه على قناة النهار برنامج صبايا الخير وقامت الست ريهام باستعراض قدارتها فى كشف الجرائم واشتكت من عدم تعاون جهاز الشرطه مع البرنامج زى زمان ..
تحدث المفاجاه ويتم استدعاء خمسه من اسرة البرنامج
المذيعه والمخرج ورئيس التحرير والمصور وغرام معدة الحلقه .. بتهمة الترتيب مع بعض الاشخاص لعمل حلقه قويه لخطف الاطفال واثارة البلبله وزعزعة الامن فى الشارع
تقوم القناة تبعت اثنين محامين طرفها باقناع غرام والمصور بالذهاب لقسم شرطة النهضه السلام ثانى بالقاهره للادلاء باقوالهم وطبعا طمنوهم ان ده اجراء عادى وهيمشوا على طول البنت راحت مطمنه مع الاتنين محامين هى والمصور ..
طبعا النيابه قررت حبسهم اربع ايام على ذمة القضيه ثم 15 يوم ويهرب المخرج ورئيس التحرير وريهام سعيد
البرنامج بيذيع حلقات قديمه والشرطه بتبحث عنها طبعا هربت وسايبه بيتها هى والمخرج ورئيس تحرير البرنامج
……..
غرام محبوسه على ذمة القضيه هى والمصور ..
لو فرضنا ان اسرة البرنامج وضعها القانونى سليم ليه بيهربوا ويسيبوا بنت زى غرام تواجه مصير مظلم ويضيع مستقبلها من غير اى ذنب وتتحطم اسرتها البسيطه ..
ولو اسرة البرنامج فعلا خططت لعمل حلقه لكسب جماهيريه على حساب امن واستقرار الوطن ايه ذنب غرام اللى واخده تكليف من رئيس التحرير والمخرج بالاتصال بشخص معين والترتيب معاه وطبعا اللى طمنها هو وجود الشرطه فى الموضوع وتامين المكان والقبض على الخاطف واسترجاع الاطفال …
اخيرا .. قضية غرام هى قضية راى عام قضية وطن ولازم تتكشف وتظهر الحقيقه ويتعرف مين الجانى ويتحاسب كل من تسبب فى تضليل المواطن واثارة الفتن وتكدير الامن العام ….
من الاخر كده اما تظهر ريهام سعيد وتنقذ غرام المظلومه واما نعملها احنا قضية راى عام والملف كله يتحول للنائب العام وتتحاسب ريهام سعيد واسرة البرنامج