وجهة نظر
بقلم: هدير خالد
لسه شايفه من شوية بوست بيتكلم عن طالبة فى صيدلة اسمها ” مونيكا ” فى حد آذاها وأخد صورها وعمل أكونت باسم ” سلمى ” وحط صورها على جروب مقزز اسمه ” كيف تشقطين رجلا ” ومش بس كده ده كمان حط صورها على جروبات كتيرة وفى صفحات مشهورة عملت شير وطبعا الموضوع تطور ووصل لأهلها وهى حالتها بقت وحشة والتعليقات السخيفة أثرت عليها نفسيا بشكل سلبى أنا ما قدرش أقولها إنتى نزلتى صورك ليه على الفيس!! لأن دى حريتها الشخصية ولدام صورها ماضرتنيش فى حاجة إذا أنا ماليش الحق إنى أحاسبها لكن اللى أقدر أكلم فيه:
_ مايصحش يا جماعة نعمل شير لأي كلام مكتوب وخلاص ما هو مش أي جملتين كونوا معنى مفيد يبقى خلاص لايك وكومنت وشير إما فين عقلك يعنى وبعدين فى ناس صفحتها كلها شير طب ليه؟! ما أنت ممكن بتفكيرك تكتب كلام أحسن مليون مرة من اللى إنت شيرته “ما تتعودش تكرر ابتكر!”.
_ لازم تاخد فى إعتبارك إن الفيس بوك والواتس والفيبر والأنستا وكل وسائل الميديا اللى موجودة حاليا واللى ممكن تظهر بعدين مجرد وسيلة للتواصل والترفيه مش علشان أكلم بنات عليها ولا علشان أعمل هكر لصفحة شخص ما وأهدده ولا علشان أعمل جروبات سخيفة تأذى حياة الناس وتضيع مستقبلهم لو ده التطور التكنولوجي الحقيقى يبقى أحسن لنا نرجع لورا! .
_ الميديا ” عالم إفتراضى ” ” مزيف ” ” مؤقت ” ” سلاح ذو حدين ” عالمنا الأساسى هو البيت والجامعة وبيوت أصدقائنا وأقاربنا والجامع والكافيهات اللى بنحب نقضى فيها وقت والمطاعم اللى حبينا أكلها والشوارع اللى بنحب نمشى فيها والمحلات اللى بنقعد فيها بالساعات علشان نشترى منها وغيره هو ده عالمنا مش الميديا اللى بقى كل وقتنا ضايع عليها لازم نعرف إن الوقت هيعدي والعالم المزيف ده هينتهى فى يوم من الأيام وإحنا هنكون خسرنا أوقات جميلة فاتت من حياتنا.
_ ماتتخدعوش يا جماعة ” بمشاهير الميديا ” لأنهم مش كاملين ولا حد مننا كامل وعلى فكرة الشهرة فى العالم الخداع ده سهلة جدا أى حد ممكن يعمل صفحة تجيب مشاهدة عالية وكومنتات كتير وشير كتير عادى لكن التحدى الأكيد النجاح فى العالم الواقعى ” اللى على أرض الواقع ” هو اللى صعب وصعب جدا كمان يعنى إنت مثلا مش هتقدر تقارن بين تعب واحد عمل صفحة مشهورة بواحد تانى بيحاول يحضر الماجستير والدكتوراه.
_ مين اللي شخصيته تجذبك أكتر الشخص الغامض المتحفظ ولا الشخص اللى عامل زى الكتاب المفتوح؟! يعنى لو كل الناس عرفوا عنك كل حاجة بتعملها فى حياتك لا وكمان بالصورة والصوت مش هيجذبهم فيك حاجة لكن شخص تانى مش بيقول كل حاجة فى حياته وحاطط حدود ماشى عليها ومبدأ ” مش أى حد يعرف كل حاجة عنى ” هيكون حوليه نظرات إعجاب وتقدير يبقى خد قرار إن مش أى حد يشوف صورك ولا أي حد يعرف عنك كل حاجة خلى حياتك ليك واللى حوليك ودى وجهة نظرى البسيطة واللى بطبقها على نفسى يعنى أنا بتحدى أي حد عندى” يقدر يقولى يعرف ايه عن هدير خالد غير بياناتها اللى على الصفحة!! “.
_ لما يكون فى إيدك حاجة فيها ” خير وشر ” قدامك حلين إما تستخدميه للخير أو ماتستخدميهوش فى الشر صفحتك على الفيس بوك إما تكتبي اللى يفيد غيرك عليها أو تسبيها فاضية أحسن لأن بجد أى جملة جميلة بنقرآها بتأثر فينا وبرده أى جملة وحشة بتمحى حاجة حلوة جوانا إذا ” فلتقل خيرا أو لتصمت ” لأن حاليا أثبت الفيس بوك حقيقة واحدة ” أن جميعنا أصبحنا نجيد فن التمثيل ” فيوجد من يدعى الفضيلة وفى قلبه فاسد يأكل من روحه ومبادئه وأخلاقه ” إلا من رحم ربى 
“.
_ أهم نقطة بقى ” الرجالة مش بتشقط ” ممكن أشباه رجال لكن الراجل الحقيقى هو اللى يعجبه شخصيتك وأخلاقك فيجيلك لحد عندك وانتى فى بيتك معززة مكرمة تمام والأهم بقى إنتى أفضل مليون مرة من إنك تدورى على حد إنتى تستاهلي اللى يدور ويسأل عليكى ويخطبك وتبقى ملكه “
