لانشون لحمة: 

 

 

 

 

 

لانشون لحمة:
فنون مطبخية
دينا جمال رفاعي

المقادير: نص كيلو لحمه مفرومه / ربع كوبايه زيت / 3 معالق كبيره مليانه دقيق / 4 قطع جبنه مثلثات او كيري / 2 بيضه / معلقه صغيره كمون / نص معلقه صغيره حبهان مطحون / رشة كزبره ناشفه / معلقه كبيره بابريكا / معلقه كبيره بصل بودر / ربع معلقه توم بودر / معلقه كبيره ممسوحه ملح / رشه فلفل اسود / لون طعام احمر حسب الرغبه / معلقه كبيره عسل ابيض / معلقه كبيره باربيكو صوص / معلقه كبيره توابل حواوشي حسب الرغبه / زتون حلقات

الطريقة:

1- نحط اللحمه في محضره الطعام وعليها التوابل كلها الاول الكمون والكزبره وبودره التوم والبصل والملح والفلفل والبابريكا وتوابل الحواوشي ونضرب كويس اوي

2- نضيف باقي المكونات الجبنه والعسل والدقيق ولون طعام لو حابين والزيت والبيض والباربيكيو صوص ونضرب تاااني حلو اوي

3- نكون مجهزين استريتش ونحط عليه الخليط ده ونلفه روول كويس اوي ونقفلها من الناحيتين ونغلفها تاااني وبعدين ورق زبده وبعدين فويل

4- نبقي محهزين مايه مغليه نحط فيها الرول ده ونسيبه ساعه وربع تقريبا وبعد نص الوقت نقلبه علي ناحيه تانيه

5- بعد كده نطلعه نفكه ونسيبه يبرد وندخله تلاجه لتاني يوم
ونقطعه شرايح رفيعه وبالف هنااااا 😊

( بصو بقي بصراحه كده هو مش طعم لانشون اللي عرفينه
ريحته خليط من حاجات حلوه كتيير وفيهااا نسبه من ريحة اللانشون بس مش صافي لانشون 😉طعمه تحفه جداااا ولاحظت كل لما قعد حسيته بقي طعمه وريحته احلي واقوي
حلو جداااا طبعا للاطفال فطار عشا بيسهل كتير 😊)

( الزتون لو اخضر هيبقي افضل بس استخدمت المتوفر وقتها عندي كان زتون اسود 😊 )

( متزودوش عن نص كيلو يعني لما بيتقطع رفيع بيدي كميه كويسه عشان مينفعش يطول كتير في تلاجه اخره اسبوع بالتقريب 😊)

 

 

Related posts