الشــاعــرة الســكـنـدريـة : ســمـاح مـشــعــل
أنا عندي من الأسباب ما يكفي كتاب
عشان أشرح بحبك لية
لو إن الحب مش محتاج ولا تفسير ولا تبرير
دي حاجه سرها مقادير… ح تفضل سر مالهوش شرح
وهو يعني كان صياد بيعرف نوع سمك في الطرح؟
ولو كان ع الكلام حاضر أنا أشرح لك
ف خد عندك أناقلبي بيرتاح لك
وإحساسي زرعتة ورود ولما قابلته فتح لك
وكام واحد طلب ودي ماحستهوش وكان بيبوش
وكنت تملي متربع علي قلبي وكله عدي من تحتك
ف من صغري بحسك في الغرام رشدي
وليك هيبة علي كاريزما وعامل للبنات أزمة
ف تاه قلبي وضاع رشدي وحبك قلبي صرح لك
وصارحته ما غشتهوش
وحتي أما الزمان شق السنين نصين
وكان بختي في حتة بعيدة عن نُصك
عمل قلبي هوا جناحين وكان سامعك وكان شايفك وكان حاسك
وعارف إن بعد البين ح تيجي والحنين قصك
ف حوشلك ورصص لك وزوق لك وخصص لك
من الأيام ربيع دايم يكون فصلك
وحتي لو شتا جالنا حيجي يرق علي حالناويشتي هيام….
وآه يا سلام
على الدنيا أما بتزهزة ويرجع وشها الصافي
وترضي بعد ما تجافي
وتديني شتا مخصوص مقاسة تمام علي لحافي
ف بتدفي بنور عينك وأحطك شال علي كتافي
ولما بيجي برق ورعد تقولي حبيبتي لا تخافي ف كارت أصفر عشان همي وكارت أحمر عشان حزنك
تعالي ضُمي واضمي….
مفيش أحزان وأنا في حضنك
……………؟؟!!!
