تيجوا نتجنن

بقلم / رباب الحسيني

تيجو نتجنن

أيوة تعالو نتجنن
متستغربوش ننسى شويه كورونا
ننسى مكر وغش …زمن ملعون
مننا متمكن… تيجوا نتجنن

نرجع تانى لطفولة بريئة
ناكل ونشرب…. نلعب…. وننام بين قلوب على بعضها بتحنن…تيجوا نتجنن

عايشين يومنا طوله وعرضه
ناسيين بكره ازاى هيكون
وبعده ……هنفضل كدا ولا هنتمدن ؟..تيجوا نتجنن

أرض وطينة وزرع وخضرة جميلة
نملى ايدينا…. نسر عنينا ….من غير غسيل ولا تنضيف
تمرى علينا …تيجوا نتجنن

منسمعش دى جي
ولا نشم عوادم عربيات ولا ريحه بنزين…
نفايات مصانع ف البحر…. تموت ثروات
تنزل جوفنا …….تسمم
نسمع صوت ساقية تدور
و مكنة ميه من غير نغمه نشاذ
تروى سمعنا قبل قلوبنا …تيجوا نتجنن

شجرة توت جميله كبيرة تستنانا
نتحامى فيها …
لما الشمس الحامية تجرى ورانا وتدور علينا…تيجوا نتجنن

طول الوقت نمتع عنينا بلوحة رسمها الخالق
قبل ايدين البني آدمين متغير فيها…. تيجوا نتجنن

لما نجوع ….خيارة جميلة…. و عود جرجير ….وحته جبنة قديمة
ورغيفين عيش…
الله عليهم ريحه القش فيهم
ناكل ونشبع
لا معدة توجع…… ولاقولون يتعصب…تيجوا نتجنن

نفوق شوية … كورونا مقصودة… ولا حرب جديدة؟
وليها علاج ولا خلاص القيامة هتقوم؟
ونحضر مدفن…. وبلاش نتجنن

نفوق كمان….. ونرجع لعقلنا دقيقه واحدة
نفكر نتغدى ايه …فراخ محقونة….
ولا لحوم مدرونة
ولا اسماك بالعلف مبطونة
نبعد عن كل ده كله
تعالوا نجيب حته جبنة …..من عند سليم
بالاسمنت الابيض والجبس….. معجونة
وبطيخه حمرا جميلةمتلجة ..بالتمبك مرشوشة
وبعد الاكل ….
نروح صيدليه الدكتور جلال يلحقنا بالانتينال
ولو الموضوع طول شويه ومتلحقناش
يبقى ليلة جميلة في الحميات…..
مع دكتورابو قلب حنين هواش

يبقى بالله عليكم مش الجنان احسن ؟؟؟
ولا بلاش نتجنن ؟؟!!!!!