أسمنت حلوان ‘الهواء به سرطانات قاتله’

متابعة _اشرف المهندس

بالصور تحقيق هانى توفيق حلوان القاهرة 

النهارده أنا هعرض على حضراتكم صور من داخل مصنع أسمنت حلوان ولكم التحقيق فيها والتأكد من صحتها 
اللي قدامكم ده حاجه اسمها كروم ودي ماده اللي بيشمها تقريبا حاسة الشم بتموت عنده وبيتصاب بإغمائات كما قال المختصون الماده دي حارقة وخطره جدا على الصحه العامه داخل وخارج الأسوار
واللي معروض ده المفروض انه باج فلتر الفحم وزي ماحضراتكم شايفينه بيسرب من كل مكان وطبعا زي ماقولنا قبل كده ان الفحم مش ليه ريحه بس بيصيب بأمراض خطيره يعني هيصيبك من غير ماتشعر بيه 
الكارثه هنا فين.؟
إن الشركه شغاله بكل ماهو مخالف للمعايير البيئية الإنسانيه بمعنى
أولا :المفروض مشروع الفحم ده مخالف للمعايير لأن المصنع بينه وبين السكان أقل من متر يعني هتموت هتموت وإذا كان عاجبك 
طبعا مش ده بس المخالفه الوحيده داخل هذه الأسوار 
كمان المصنع إشتغل بالزبالة وقش الرز وكل ماهو مخالف وطبعا دا من أجل التوفير 
طيب وكمان المصنع بيقطع المصنع القديم علشان يبيعوه خرده زي ماباعوا أرض الجراش اللي فيها قصر صالح باشا عنان ودا تابع للتراث المصري 
وطبعا دا مخالف للقانون الدولي والمصري والإنساني لأنه لايحق للمستثمر الأجنبي لشراء أو بيع أرض مصريه وطبعا تمت البيع بالتحايل ودخول شركة وساطة بس دي مش مشكلتنا دلوقتي في الصور بعت قرار إيقاف البيع ومع ذلك تمت البيع وضربوا بقرار المحافظ عرض الحائط 
نرجع بقى لباقي المخالفات اللي داخل الأسوار

عارفين الصرف المغطي للشركة بيرمي المياه الملوثة المسرطنة فين
بيرموها في محطة مياه كفرالعلو علشان اللى مش هيموت من الهواء الملوث هيموت من المياه المسممه اللي كلها سموم وأمراض طبعا الهدف من الأول التوفير 
والمفروض إن ده صرف مغطى مغلق يعني داخل أسوار المصنع فقط بس هما لقيوا الناس ساكتين قالك يرموا عليهم كمان مياههم المسمومة واهو محدش شايف حاجه ولا حد هيشتكي من الأساس 
تعالوا بقى نروح على حاجه اسمها بن أبيض ودا هتلاقيه بالظبط عند نقطة الشرطه القديمه من الخارج ومن الداخل بجوار مخزن التشوين 
البن ده هو الترابه البيضه المطحونه هتلاقي جبل منه وطبعا الهواء بيطير ده على بيوت أهالي عرب ابو دحروج وعموما تقدروا تروحوا على أي بيت وتشوفوا هتعرفوا تقفوا وتاخدوا نفسكم ولا لأ.فيه حاجه تانيه ودي القانون اللي بيحددها 
المفروض اي حاجه المصنع بيركبها مثل ماكينة أكياس أو ماشابه المفروض وزارة البيئه بتفرض على الشركه بتوقيع بعض من الأهالي المحيطه للمصنع واللي حصل 
تم تركيب عدد اثنين ماكينة لمصنع الأكياس بالتحايل على القانون وهناك بلاغ يخص ذلك

طبعا غير ترابة الباي باص والكولر 
سؤال للمسئولين المصنع هو إنتوا عاوزين تموتونا من غير حتى ما نصرخ من الوجع.عاوزين نعرف رأى الناس اللي لسه بيقولوا المصنع صديق البيئه وليه مصممين ينافقوا 
دا حتى الزرع مش سلم من التلوث وتوفاه الله

إنتم عارفين يعني إيه وجع طفل تحت جهاز التنفس الصناعي بيستغيث بضمير كل مسئول ومحتاج يشم هواء نظيف بلا أمراض

عارفين يعني إيه ناس مش بقى معاهم حتى ثمن الجلسه واللي بيصبروا على مرضهم يمكن بكره يشموا هواء نظيف

إنتوا عارفين إن إختلافنا مع بعض هو اللي بيخلي المستثمرين يعملوا فينا ويوفروا على حساب صحتنا وحياتنا

إنتوا حاسسين أصلا بإن أياديكم ملوثه بدماء الأبرياء

لازم كلنا نكون ايد واحدة مش علشاني ولا علشانك علشان جيل ملهوش ذنب طالع للحياه نفسه في أقل حاجه وهو أنه يتنفس هواء بلا أمراض وكفاية بقى كل اللي فات

Related posts