قولتلها إيه.. عني؟!!!

للشاعرة السكندرية / سماح مشعل

قولتلها أيه عني …؟؟!!!
كلمتها عني
قولتلها خنقاني!؟
بتحبني هيه
وانا منها بنعاني
غياره بزياده بتشم ف هدومي
بتنام بعين واحده وبتقرا فنجاني
قولتلها ايه تاني….؟!
بتعد انفاسي خلتني مليتها
برتاح علي القهوه وكرهت قعدتها
الغيره عقدتها وكرهت عشرتها
انت البرئ دايما.. دايما أنا الجاني
قولتلها ايه تاني…؟!
شكلي ماهوش عاجبك
شعري ماهوش مفرود
وعندي جوز صبيان
عيال ف شكل قرود
يوماتي بتصرخ
وحياتهافي المطبخ
ياريتني كنت افضل في الدنيا وحداني
قولتلها ايه تاني…؟!
حقك تقول معذور
حقك تقول اكتر
وكأن هذا البيت
معمول كده منظر
عشان سعادتك تيجيه يوماتي متكدر
وتخش ضارب بوز وعلينا تتفرج
ماانتاش بتسال ليه الوضع متغير
وايه اللي دبلني وشكلي بقا اكبر
بداري في هدومي
وبمضغ اللقمه وابلعها بهمومي
ماجتش ليه مره تسألني إيه مالك؟
في حاجه تعباكي ومغيره حالك؟
انت ولا بتحس
ماانت كده اناني
شاطر اوي ف البعد
والباب بقا موارب
قدمت لك ١٠٠سبت
ولا حدي جه مره
محرومه كلمة شوق
والحوجه دي مُره
#حضنك بقا بارد
مقفول علي مخده
وسايبني للوحده
لحظة حنيني ليك
بقتلها وانا قاصده
عايشه بأوجاعي
شايله علي دراعي
هم العيال والمال
ومذاكره ومجامله
للجاره والوالده
وبرغم ضيق الحال
ولا قولت ٱه ياني
واهي ماشيه بالبركه
والعشره ع الفكه
واهو يوم بيتقضي
والحمد ف لساني
وبخبي حرماني
لو حاجه عاجباني
عشان ماتتوجع
وتحس احزاني
قولتلها ايه تاني
كلمتها عنك؟!
عرفتها إنك
بتهد بيت شايلاه
علي قلبي وكفوفي
حيطانه سنداها
بكل ما أوتي
بديكوا من قوتي
وحياتكوا لو موتي
ارضي اموت تاني
ماانا مت ياما كتير
م الحيره والتفكير
جايز جمعنا سرير
لكن روحك بعيد
عايشه ف عالم تاني
حساك ومش بنطق
وبدادي ف سكوتي
وبقول مسيره يفوق
والعشره مش حتهون
واللمه وعيالنا
حيعقلوا المجنون
بالصبر بتصبر
وعزيمتي وايماني
وبدعي كل ٱدان
ترجع لأحضاني
………؟؟!!

 

قد يعجبك ايضا