فته باللحمه

  • تاريخ النشر :
  • عدد المشاهدات : 40 4 5

فنون مطبخية
دينا جمال رفاعي

المقادير: تلت كوبايات رز / كيلو لحمه / عيش بلدي مقطع ومتحمص في الفرن / ملح / فلفل اسود / حبهان / ورق لورا / واحده طماطم / بصله / 6 وحدات طماطم مقشره ومفرومه في الكبه / راس توم مفروم / كزبره ناشفه / زيت / 
شوربه اللحمه / بابريكا / خل

الطريقه:

1- اول حاجه نحط مايه تغلي علي النار وبعدين نحط فيها اللحمه ونعلي عليها لحد ما تاخد غلوه كده وبعدين نوطي خالص ونحط واحده طماطم مقطعه اربعه وبصله مقطعه اربعه بردو ونحط ورق اللورا والحبهان ونسبها ساعه ونص وبعد كده نحط الملح والفلفل ونسبها تكمل سوا

2- في حله تانيه نحط زيت او زبده حسب الرغبه ونكون غسلين الرز كويس ونحطه عليهم ونقلب شويه وبعدين نسقي بشوربه اللحمه ونحطله ملح وفلفل بس مش كتير عشان الشوربه بتبقي فيها اصلا ونسيبه يستوي سوا الرز العادي

3- العيش البلدي نقطعه مربعات صغيره ونحطه في صنيه في الفرن يتحمص حلو وبعد ما يخرج نرش عليه كزبره ناشفه ونسيبه علي جنب

4- الصلصه بقي اساس الفته كلها 😉 بقشر طماطم كتير وبحطها في الكبه وبكون مقشره راس توم وبحط في طاسه زيت او زبده او الاتنين مع بعض وبحط التوم المفروم واقلب شويه ياخد لون حلو وبعدين بحط رشه ملح وكزبره ناشفه شويه حلويين وبعدين الخل بقي ونستمتع بااحلي صوت وريحه 😉😉 وبعدين بنحط الطماطم المفرومه ونقلب وبحط رشه بابريكا واسبها بقي شويه حلوين كده علي النار

5- اللحمه بعد ما تستوي نطلعها من الشوربه ونسبها علي جنب شويه تبرد وبعد ما بنخلص الصلصه بسيب شويه في الطاسه واشوح فيها اللحمه بتبقي فظيعه جدااا 😉

6- نظبط بقي الطبق بتاعنا اول حاجه هنحط العيش
المحمص بالكزبره ونحط عليه شوربه تكون سخنه ( انا مش بحط كتير بحب يكون في قرمشه شويه 😉) وبعدين الرز وبعدين الصلصه واللحمه وباااااالف هنااااااا😉😉😉😉

( كام حاجه بسيطه كده هيفرقوا كتير في الفته 😉 العيش يبقي مقرمش وبلاش شوربه كتير ويبقي في شوربه علي جنب للي حابب يزود 😊 اللحمه تتشوح في الصلصه بتبقي تحفه 😊 الفته بيتحط عليها كزبررره ناشفه عاااادي جدااا وطعمها حكااايه 😊 طبعاااا الصلصه بردو تبقي كتييير وموجوده في طبق علي جنب لان بنحتاج نزود تاني )

الاقسام

كلمات المشاركة

تعليقات الموقع

تعليقات الفيسبوك

ابحث معنا

مساحة اعلانية




شاركنا صفحتنا